Shymkenttiń polıtseıleri qoǵamdyq tártipti velosıpedpen baqylaýǵa kóshti
ShYMKENT. QazAqparat - Kún jylyǵan soń Shymkenttiń polıtseıleri qoǵamdyq tártipti velosıpedpen baqylaýǵa kóshti. Kóktem kelisimen, qaladaǵy tártip saqshylary yńǵaıly «kólikke» otyrýdy jón dep tapty, dep habarlaıdy QazAqparat HAA tilshisi.
Aıta keteıik, ótken jyly tájirıbe retinde qolǵa alynǵan joba qys mezgilinde toqtap qalǵan bolatyn. Endi velopolıtsııa jumysyn qaıta jandandyrǵan tártip saqshylary qalanyń saıabaqtarynda qoǵamdyq ortanyń tynyshtyǵyn saqtaýǵa jumyldyryldy. Bul ári densaýlyqqa paıdaly jáne qorshaǵan ortaǵa esh zııany joq. Eń bastysy, jedel áreket etýge taptyrmas qural. Qazir, velosıped mingen polıtseıdi qaladaǵy saıabaqtar men demalys oryndarynan kórýge bolady.
«Olardyń jaqsy tusy jerleri avto kólik júre almaıtyn jáne kólikke tyıym salynǵan jerlerde bizdiń qyzmetkerler velosıped arqyly baqylaý júrgizip, profılaktıkalyq is sharalardy atqarady»,- deıdi Shymkent qalalyq jergilikti polıtsııasynyń shtab bastyǵy Sherzod Jumatov.
Ázirge, polıtseıler 10 velosıpedpen qala kóshelerin aralap júr. Aldaǵy ýaqytta onyń sanyn ulǵaıtý kózdelip otyr. Tártip saqshylary osy arqyly qoǵamdyq tártipti baqylaýda.
