Shymkenttiń oqýshylaryna erlik pen patrıotızm týraly sabaq ótkizildi

ShYMKENT. QazAqparat - Qazaqstan qorǵanys mınıstriniń Shymkent garnızonyna jumys sapary aıasynda M.H. Dýlatı atyndaǵy №8 mamandandyrylǵan gımnazııada erlik pen patrıotızm jóninde sabaq ótkizildi, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Sabaq barysynda 9-11 synyp oqýshylary zamanaýı qazaqstandyq armııa, áskerı qyzmet pen áskerı qyzmetshiniń mamandyǵy týraly aqparatqa qanyq boldy. Joǵary synyp oqýshylaryna mınıstr patrıotızmniń maǵynasy, Qazaqstan Qarýly Kúshteriniń tehnıkalyq jabdyqtalýy men jetistikterin aıtty. Sonymen qatar kórneki jáne qarapaıym praktıkalyq mysaldar keltirdi.

Balalar beıresmı áńgime barysynda ózderin qyzyqtyrǵan suraqtaryn qoıa aldy.

Mınıstr jastarǵa búkil qaırat pen kúsh-jigerdi alǵa qoıǵan maqsatqa jetý úshin jumsaýdy, ýaqytty baǵalap, ony tıimdi paıdalanýǵa, ózderiniń muǵalimderine qurmet kórsetýge shaqyrdy. Sonymen birge ár adamnyń bilimge degen qushtarlyǵy, tyń oılary men minezi osy jas kezde qalyptasatynyn atap ótti.

Mundaı sabaqtar qazaqstandyq oqýshylarmen turaqty jáne jıi ótkiziledi. Jas urpaqqa osyndaı formattaǵy áńgimelesý men ashyq dıalog unaıdy. Áskerıler tájıbeli mamandar retinde ózderiniń bilimderimen bólisse, al óskeleń urpaq mektep qabyrǵasynan bastap patrıot bolýmen qatar, Otan aldyndaǵy ózderiniń jaýapkershilikteri men mindetterin túsinýge úırenedi.