Shymkenttiń munaı óńdeý zaýyty jumysyn ýaqytsha toqtatty
ShYMKENT. QazAqparat - Shymkenttiń munaı óńdeý zaýyty kúrdeli jóndeý jumystarynyń bastalýyna baılanysty búginnen bastap ýaqytsha toqtady. Bul týraly «PetroQazaqstan Oıl Prodakts» JShS baspasóz qyzmetinen málim etti, dep habarlaıdy QazAqparat tilshisi.
Baspasóz qyzmetiniń málimetinshe, Shymkent munaı óńdeý zaýytynyń tehnologııalyq qondyrǵylaryna josparly-aldyn alý jóndeý jumystaryn júrgizý kestesi Qazaqstan Respýblıkasy Energetıka mınıstrligimen kelisilgen. Kúrdeli jóndeý jumystaryn júrgizý ónerkásiptik qaýipsizdik talaptaryn oryndaýǵa, jabdyqtardyń senimdi jumys isteýin jáne de kásiporynnyń sapaly ári úzdiksiz jumys isteýin qamtamasyz etýge baǵyttalǵan.
Zaýytty jańǵyrtý jumystary barysynda RFCC katalıtıkalyq krekıng kesheniniń jańa nysandary men shymkenttik MÓZ-diń qoldanystaǵy nysandaryn ıntegratsııalaý boıynsha is-sharalardy atqarý josparlanǵan.
Eske salaıyq, munaı óńdeý zaýytyn jańǵyrtý jobasynyń birinshi kezeńi 2017 jyly aıaqtaldy, 2-kezeńdi 2018 jyldyń úshinshi toqsanynda aıaqtaý josparlanyp otyr.
