Shymkenttiń megapolıs atanýy jańa múmkindikterge jol ashady - Túımebaev
ShYMKENT. QazAqparat - Búgin Shymkent qalasyna megapolıs statýsyn berý máselesi qaralǵan máslıhattyń kezekten tys sessııasy ótti. Halyq qalaýlylarynan bólek sessııa jumysyna qatysqan oblys ákimi Janseıit Túımebaev pen qala ákimi Nurlan Saýranbaev barsha jurtty Shymkent qalasy turǵyndary sanynyń 1 mıllıonǵa jetýimen shyn júrekten quttyqtady, dep habarlaıdy QazAqparat tilshisi.
Respýblıkalyq mańyzy bar qala mártebesi jańa múmkindikterge jol ashatynyn aıtqan óńir basshysy mundaı ózgeris qalanyń damýyna oń áserin alyp keletinin atap ótti.
«Shymkent qalalyq máslıhatynyń VI shaqyrylymdaǵy depýtattary kezekten tys 29-shy sessııasynda el ómiri úshin mańyzdy máselege daýys berdi. Elbasymyz Nursultan Ábishuly Nazarbaevtyń bastamasymen birneshe jyl buryn Shymqalany mıllıon turǵyny bar ortalyqqa aınaldyrý bastamasy kóterilgen bolatyn. Endi mine, sol maqsat júzege asyp, Shymkent elimizdegi mıllıondyq halqy bar úsh qalanyń birine aınaldy. Quttyqtaımyn! Bizdiń súıikti qalamyzdyń orny óńir úshin ǵana emes, Qazaqstan úshin de aıryqsha mańyzǵa ıe. Uly Jibek jolynyń boıyndaǵy bul shahardyń tarıhy men tamyry tym tereńde jatyr. Orta Azııadaǵy san ǵasyrlyq ǵumyry bar sanaýly qalalardyń biri bolǵan Shymkent, endi biregeıine aınalý baǵytyna tústi. Munyń barlyǵy bizge zor maqtanyshpen qatar, úlken jaýapkershilik júkteıdi», - dedi aımaq basshysy.
Janseıit Túımebaev sondaı-aq oblystyń áleýmettik-ekonomıkalyq damýyna súbeli úles qosqan birqatar azamattardy «Oblysqa sińirgen eńbegi úshin» medalimen jáne oblys ákiminiń Qurmet gramotasymen marapattady.
Jıyn sońynda qala ákimi Nurlan Saýranbaev alda atqarar jospardyń kóp ekenin, onyń barlyǵy máslıhat depýttary men qala turǵyndarynyń qoldaýymen ǵana júzege asatynyn aıtyp, aldaǵy ýaqytta birlese jumys isteýge shaqyrdy.
