Shymkenttiń medıtsına mekemelerine jańa kólikter berildi

ShYMKENT. QazAqparat - Shymkent qalasyndaǵy medıtsına mekemelerine gýmanıtarlyq kómek retinde jańa jedel járdem kólikteri paıdalanýǵa berildi.

Buǵan deıin qalaǵa jasandy tynys alý apparattary men pýlsoksımetrler jáne ottegi kontsentratorlary bar gýmanıtarlyq júk kelgen bolatyn, dep habarlaıdy QazAqparat tilshisi.

Atap aıtqanda, qalaǵa 10 ottegi kontsentratory men 50 pýlsoksımetr jáne bir ókpeni jasandy jeldetý apparaty (ÓJJ) jetkizilgen. Sondaı-aq, «Shevrolet Damas» markaly 3 jedel járdem kóligi tapsyryldy. Bul kómek «Samuryq-Qazyna» AQ men QR Densaýlyq saqtaý mınıstrligi arasyndaǵy yntymaqtastyq týraly Memorandým aıasynda kórsetilip otyr. «Samuryq-Qazyna» AQ kompanııalar toby qaıyrymdylyǵynyń biryńǵaı operatory – «Samruk-Kazyna Trust» Áleýmettik jobalardy damytý qory qajetti jabdyqtardy satyp alyp, olardy óńirlerge jiberdi.

«Pandemııaǵa baılanysty dárigerler halyqqa medıtsınalyq kómek kórsetý úshin kúndiz-túni jumys isteýde. Kez kelgen kómek naýqasty der kezinde emdeýge úlken áserin tıgizip otyr. Osyndaı qıyn-qystaý ýaqytta qol ushyn sozyp jatqan jandarǵa alǵysymyz sheksiz», - deıdi Shymkent qalalyq juqpaly aýrýlar aýrýhanasynyń bas dárigeri Erejepov Baqtyǵalı.