Shymkenttiń kilemderi Qytaıǵa eksporttalmaq
ASTANA. QazAqparat - Shymkenttegi «Ońtústik» AEA ornalasqan kilem ónimderin shyǵaratyn «Bal Tekstıl» JShS óz ónimderin ishki naryqta da, syrtqy naryqta da belsendi taratýda, dep habarlaıdy OQO ákiminiń baspasóz qyzmeti.
Búginde kilem ónimderin satý úshin alys jáne jaqyn shetel ókilderimen baılanys ornatqan. Endi fabrıka basshylary taıaýda Evropadaǵy áriptestik baılanysty nyǵaıtyp, tekstıl ónimderin Qytaı naryǵyna shyǵarýdy josparlap otyr. Búgingi tańda fabrıka ónimderi Qyrǵyzstan, Tájikstan, Ázerbaıjan, Reseı, Ulybrıtanııa, Germanııa jáne Frantsııaǵa eksporttalady. Іri sheteldik tapsyrys berýshiler sany 20-dan astam.
Kásiporynda kilem, kilem ónimderi toqylady, polıpropılen jipteri shyǵarylady. Kilem óndirisine qajet shıkizat Reseı, Túrkııa, Bangladesh, Úndistan jáne taǵy basqa alys shetelderden tikeleı jetkiziledi. Al kilemniń ózi munda Belgııanyń joǵarǵy tehnologııaly Michel Van De Wiele jabdyǵynda toqylady.
Búgingi tańda kilem jáne kilem ónimderin shyǵarý óndirisiniń qýattylyǵy jylyna 5 mln sharshy metr ónimdi quraıdy. Kásiporynda kilemniń eki myńǵa jýyq biregeı túri shyǵarylady. Olardyń arasynda klassıkalyq sýret, dástúrli órnekpen toqylǵandary da, dızaınynda modern elementteri bar, sondaı-aq zamanaýı haı-tek jáne avangard stılde toqylatyn kilemder de bar.
Al polıpropılen jibin ıirýdiń qýattylyǵy - jylyna 4000 tonna. Qazir kásiporynda 236 adam jumys isteıdi.
