Shymkenttiń eks-ákimi Ǵabıdolla Ábdrahymov qaramaǵyndaǵy qyzmetkerlerden keshirim surady
ShYMKENT. QazAqparat - Shymkenttiń burynǵy basshysy Ǵabıdolla Ábdrahymov búgin qala ákimdiginde sońǵy jıyn ótkizip, áriptes qyzmettesterimen qoshtasty, dep habarlaıdy QazAqparat tilshisi.
«Qatty ketken kezderim bolsa, keshirim suraımyn», - dedi ol.
«Memlekettik qyzmettegi eń jaqsy jyldarym Shymkentte ótti. Orynbasarlaryma, bólim basshylaryna, aýdan ákimderine, jergilikti polıtsııa qyzmetiniń basshylaryna alǵys aıtamyn. Jumysta bári bolady, eger sizderdi renjitken bolsam, keshirim suraımyn. Men shyn júregimmen sizderdi qurmetteımin», - dedi Ǵabıdolla Ábdrahymov.
Jıynda Ǵabıdolla Ábdirahymovqa da jyly lebizder aıtyldy. Onyń elden erek eńbegin sóz etkender endigi qyzmetine sáttilik tiledi.
«Sizben jumys isteý bir ǵanıbet. Ketkenińizdi qalamap edik. Biz ǵana emes, shymkenttikter de. Sizdiń qalǵanyńyzdy suradyq. Sizdi bári jaqsy kóredi, qurmetteıdi. Birge istegen jumysymyz úshin raqmet. Alda sizge sáttilik tileımiz. Siz bizge kóp nárse úırettińiz. Biz bir ujym bolyp jumys istedik» - dedi Shymkent qalalyq bıýdjetti josparlaý bóliminiń basshysy Gúljan Qurmanbekova.
Esterińizge salaıyq, Ǵabıdolla Ábdrahymov 2015 jyldyń tamyzynan bastap Shymkenttiń ákimi boldy. Al, kúni keshe ol "Nur Otan" partııasynyń hatshysy laýazymyna taǵaıyndalǵan edi.
