Shymkenttiń damý baǵdarlamasy qabyldandy
ShYMKENT. QazAqparat - Mıllıonǵa jýyq halqy bar Shymkenttiń damýy tujyrymdamalyq baǵdarlamasy Shymkent qalalyq máslıhatynyń kezekten tys jıyrma segizinshi sessııasynda qaralyp, qabyldandy. Sessııaǵa Shymkent qalasy ákiminiń orynbasary Qaırat Nurtaı men qalalyq máslıhat sessııasynyń depýtattary, aýdan ákimderi jáne qurylymdyq bólim basshylary qatysty, dep habarlaıdy QazAqparat tilshisi.
Sessııa tarıhynda alǵash ret Shymkent qalasy óńirlik megapolısiniń turaqty jáne keńistik damýynyń tujyrymdamalyq baǵdarlamasyn qabyldaý týraly usynys aıtylyp, qala ákiminiń orynbasary Tımýr Baımuhanovtyń baıandamasy tyńdaldy.
«Mamyr aıynda Astana qalasynda ótken forýmda Elbasy N.Nazarbaev:«Megapolıster dáýiri kele jatyr. Demek olardyń arasynda básekelestik paıda bolady. Buryn mıllıondaǵan halqy bar qala Almaty bolsa, búginde olardyń qatarynda Astana men Shymkentte bul protsester jalǵasady» dep málimdedi. Olaı bolsa, bizdiń qalamyzda turaqty jáne keńistik damýynyń tujyrymdamalyq baǵdarlamasy bolýy kerek. Bul qajettilikten týyndap otyr. Megapolısti damytýdyń qazirgi kezeńi tájirıbeni qaıta qaraýǵa jáne burynǵy jetistikterdi sıntezdeýge áreket dep ataýǵa bolady», - dedi qala ákiminiń orynbasary.
Qalalyq máslıhattyń depýtattary Shymkent qalasynyń alyp megapolıs bolyp, onyń damý baǵdarlamasyn bekitý týraly qujat tuńǵysh kóterilip otyrǵanyn tilge tıek etti. Sondaı-aq,sessııada qaralǵan ózge de máseleler depýtattar tarapynan qoldaý tapty.
