Shymkenttiń basty kósheleri men olardyń boıyndaǵy úılerdiń kelbeti jańartylady
ShYMKENT. QazAqparat - Shymkentte kópqabatty turǵyn úılerdiń qasbeti jańarady.
Bul týraly búgin Shymkenttiń arhıtektýralyq kelbeti men kólik ınfraqurylymyn damytý máselesi talqylanǵan keńeste aıtyldy, dep habarlaıdy QazAqparat HAA tilshisi.
Óńir basshysy Janseıit Túımebaevtyń tóraǵalyǵymen ótken jıynǵa qala, aýdan ákimderi men salalyq bólim basshylary, sondaı-aq merdiger kompanııalardyń jetekshileri qatysty.
Shymkent áýejaıynan ákimshilik iskerlik ortalyqqa deıingi uzyndyǵy 17,8 shaqyrymdy quraıtyn ortalyq kópqabatty turǵyn úılerdiń qasbetterin árleý jaıy boıynsha baıandama jasaǵan Ǵ.Ábdirahymov, atalǵan basty bes kóshe men dańǵyldyń boıyndaǵy 17 kópqabatty turǵyn úı jóndeýdi jáne árleýdi qajet etetinin jetkizdi. Barlyq turǵyn úılerdiń qazirgi jáne bolashaqtaǵy ózgergen kórinisi óńir basshysynyń nazaryna usynyldy.
«Atalǵan nysandardyń syrtqy kelbetin retke keltirý maqsatynda eskızdik jobalar daıyndaldy. Oǵan sáıkes, barlyq kópqabatty turǵyn úılerdiń qasbetteri men búıir betterin tolyǵymen jáne tómengi birinshi qabattaǵy kommertsııalyq qurylymdardy qoıý tústermen, granıt tastarmen birkelki stılde retke keltirý qajet. Al joǵarǵy qabattaryn ashyq túste árleý jáne qazirgi zamanaýı materıaldardy qoldanylatyn bolady. Búgingi tańda, árbir úıge bir-bir merdiger mekemeden belgilenip qoıyldy», - dedi Ǵ.Ábdirahymov.
Kún tártibindegi alǵashqy máselege qanyqqan aımaq basshysy kórsetilgen barlyq jobalarǵa oń baǵasyn berip, qoldaıtynyn, dese de keıbir jobalardy qaıta pysyqtaýdan ótkizý qajettigin atap ótti.
«Shymkent - Ońtústik Qazaqstan oblysynyń ortalyǵy. Shaharymyzǵa kelgen qonaqtar qalaǵa qarap, oblysqa baǵa beredi. Sondyqtan, qurmetti merdigerler, jumystardy sapaly ári merzimdi atqaryp, ony iske asyrýda otandyq qurylys materıaldaryn paıdalanyńyzdar», - dedi aımaq basshysy.
Munan soń, jıynda shahardyń kólik ınfraqurylymyn damytý jaıy sóz boldy. Shymkent qalalyq jolaýshylar kóligi jáne avtomobıl joldary bóliminiń basshysy Qýatjan Jumataev osy baǵytta atqarylyp jatqan jumystar men jobalardy tanystyryp ótti. Onyń sózinshe 2020 jylǵa deıin Shymkenttegi mańyzdy degen jol qıylystaryna bes jol aıyryǵy salynyp, paıdalanýǵa beriledi. Bes nysannyń alǵashqy ekeýi kelesi jyldan bastap iske asyryla bastaıdy dep kútilýde.
Jobalar retimen muqııat tanysqan oblys ákimi olardy áli de qaıta qarap, qarjysyn jan-jaqty tıimdi etip esepteýdi, sáıkesinshe, nysandardyń sapasyna mán berýdi jiti tapsyrdy.
