Shymkenttiń bas polıtseıi prokýrordy aıyptaý úshin vıdeony montajdap alǵan
ShYMKENT. QazAqparat - Shymkenttik bas polıtseı prokýrorǵa qatysty beınejazbany ózine kerekteı etip montajdap alǵan. Sóıtip qadaǵalaýshy organ ókilin orynsyz aıypty etip kórsetkisi kelgen. Mundaı málimdemeni búgin qalalyq mamandandyrylǵan ákimshilik sotynyń sýdıasy Nurlan Álıev málimdedi, dep habarlaıdy «QazAqparat» HAA tilshisi.
Atalǵan ákimshilik isti qaraǵan sýdıanyń sózinshe, sot otyrysy barysynda oblystyq prokýratýranyń aǵa prokýrory Nurjan Polatovtyń spırttik ishimdik iship rýlge otyrmaǵany dáleldengen. Kólikti onyń dosy B.Mamyrbaev tizgindegen. Sotta jaýap berý barysynda Nurjan Polatov kólikti toqtatý kezinde polıtsııa qyzmetkerleriniń janynda olardyń basshylary - Danııar Meıirhan bolǵanyn aıtqan. Onyń aıtýynsha, qalalyq jergilikti polıtsııa qyzmetiniń basshysy oǵan «Sen oblystyq prokýratýra qyzmetkerisiń ǵoı, jergilikti polıtsııa qyzmetkerlerin prokýratýra tekserip, mazalap jatyrsyńdar» dep dóreki sóılep, bas arazdyǵy bar ekenin bildirgen. Sodan azamattyq kıimde bolǵan bas polıtseı ratsııamen birneshe qyzmettik kólikti shaqyrtqan. Basshynyń aıtýy boıynsha qyzmetkerleri hattamaǵa rýlde qadaǵalaý organy ókili otyrǵan dep toltyrǵan. Bul sózdi ákimshilik hattamany toltyrǵan polıtsııa qyzmetkeri de rastap, sotqa bergen jaýabynda prokýror mingen kóliktiń jol erejesin buzǵanyn kórmegenin jetkizipti. Osy jaýaptardy negizge alǵan sýdıa sotqa qaıta talap aryz túsirgen prokýrordyń ótinishin qanaǵattandyryp, jergilikti polıtsııa qyzmetkerleri toltyrǵan hattamanyń kúshi joıylǵanyn aıtty. Ári dúıim jurtqa jarııa etilgen beınejazba da shyndyqqa janaspaıtynyn tilgi tıek etti.
«Polatovty toqtatqan kezde Danııar Meıirhan sol jerde bolǵan. Ol óziniń symtetik quralyna túsirgen beınejazýdy, ózine kerekteı etip montajdap alǵan. Jáne júrgizýshige qatysty hattamany toltyrýǵa quqyǵy bolsa da, ózi hattamany toltyrmaǵan»,-deıdi sýdıa Nurlan Álıev.
Eske salaıyq, Shymkentte jergilikti polıtsııa qyzmetkerleri oblystyq prokýratýra qyzmetkerin iship alyp, kólik júrgizdi dep aıyptaǵan bolatyn. Tipti onyń rýlde bolǵanyn dáleldeıtin beınejazbany jarııa etken edi. Alaıda qadaǵalaý organynyń ókili polıtseılerdiń oǵan qatysty ákimshilik hattama toltyrýyn zańsyz dep, sotqa keri shaǵym túsirgen bolatyn.
