Shymkenttiń avtobýs júrgizýshilerin mádenıetti bolýǵa shaqyrdy
ShYMKENT. QazAqparat - Búgin Shymkent qalasynyń jolaýshylar kóligi jáne avtomobıl joldary bóliminiń basshylary qalalyq avtopark jumysshylarymen kezdesti.
Jıynda jaýapty avtobýs júrgizýshilerin mádenıetti bolýǵa shaqyrdy, dep habarlaıdy QazAqparat HAA tilshisi.
Sońǵy kezde shym shahardyń avtobýs júrgizýshileri men kondýktorlaryna qatysty syn pikirler kóptep aıtylýda. Ásirese, qoǵamdyq kóliktegilerdiń jol erejesin saqtamaıtyny, saldarynan jol apattary oryn alǵany belgili. Budan bólek kondýktorlarǵa aıaldamalarda daýys kótermeý kerektigi eskertilgenimen, tártip ońalmaı keledi.
Osyny eskergen sala basshylary men jergilikti poltsııa qyzmeti jolaýshylar tasymalymen aınalysatyn kompanııa basshylarymen jáne júrgizýshilermen kezdesti. Jıynda qoǵamdyq kólik qyzmetinde minez-qulyq normalaryn saqtaý jaıy sóz boldy.
Bul baǵytta júrgizýshiler men kondýktorlarǵa ótken aptada arnaıy semınar-trenıngter ótkizilgen-di. Maqsat - qoǵamdyq kólik qyzmetkerleriniń biliktilik deńgeıin arttyryp, etıkalyq-estetıkalyq qasıetterin shyńdaý. Bul qadamnyń azamattardy qoǵamdyq kólikte oryn alatyn túrli jaısyzdyqtar men quqyq buzýshylyqtardan saqtaýǵa tıgizetin áseri mol ekeni belgili.
Óz kezeginde Shymkent ákimi Ǵ.Ábdirahymov ta qalalyq avtopark basshylarymen kezekti kezdesýinde marshrýttardyń tıimdiligin arttyrý, kestege saı júrip otyrý máselesin kótergen bolatyn. Sondaı-aq elektrondy bılet berý júıesine kóshý, avtoturaqtardy jańalaý, ekologııalyq taza otyn túrlerin paıdalaný jáne qoǵamdyq kólikterdiń biregeı aq jáne jasyl tústi úlgisin saqtaý týraly naqty tapsyrmalar bergen edi. 
