Shymkenttiń aýrýhanasyna es-túzsiz túsken adam esin jımastan qaıtys boldy
ShYMKENT. QazAqparat - Shymkenttiń aýrýhanasyna es-túzsiz túsken adam esin jımaǵan kúıi qaıtys boldy. Bir apta buryn qalalyq jedel medıtsınalyq kómek kórsetý aýrýhanasyna jatqyzylǵan naýqasty eshbir adam izdep kelmepti. Bul týraly emdeý mekemesi bas dárigeriniń orynbasary Sársen Pernebekov málimdedi, dep habarlaıdy QazAqparat tilshisi.
Sársen Pernebekovtyń sózinshe, 45 jas shamasyndaǵy er azamat Mártóbe eldi mekeninen jetkizilgen. Es-túzsiz jatqan adamdy kórip, adamdar jedel járdem shaqyrtypty. Onyń aýrýhanaǵa túsken kezdegi jaǵdaıy óte aýyr bolǵan. Dıagnozy - mıyna qan quıylýy nátıjesinde ınsýlt alǵan degen qorytyndy jasalǵan. Jasandy tynys alý aparattyna qosylyp, sonymen dem alypty. Dárigerler sondaı-aq marqumnyń denesinde sýretter bolǵanyn, soǵan qarap onyń buǵan deıin jazasyn óteý mekemesinde bolýy múmkin dep boljaǵan edi. Biraq sol bir aptanyń ishinde ony izdep kelgen tiri jan bolmapty.
