Shymkenttiń ákimi qoǵamdyq kólikpen júrip, kóptegen máseleniń betin ashty
ShYMKENT. QazAqparat - Úsh kún boıyna jumys ornyna qoǵamdyq kólikpen qatynap júrgen Shymkenttiń ákimi birqatar kemshilikterdi jaıyp saldy. Ǵabıdolla Ábdirahymov eskirgen aıaldamalardy jańartyp, jolaýshyny aıqaılap shaqyratyn kondýktorlarǵa shara qoldanýdy tapsyrdy, dep habarlaıdy QazAqparat tilshisi.
Shahar basshysynyń sózinshe, jolaýshylar tasymalynda tártipke kónbegenderdi jazalý qajet. Bıýdjetten qajetti qarajat bólip, tozyǵy jetken aıaldamalardy memleket menshigine qaıtarý kerek. Ótken jyly Shymkentti «Las- Vegasqa aınaldyramyn» dep kúlli jurtty aýzyna qaratqan Ǵabıdolla Rahmatollauly osylaısha qoǵamdyq kólikter jumysyn retke keltirýge shyndap kirisken syńaıly.
Onyń sózinshe, halyq sany mıllıonǵa jýyqtaǵan qalanyń aıaldamalarynda sheteldegideı shahardyń kartasy men qaı baǵytta avtobýstar qatynaıtynyn bildiretin keste joq. Sondyqtan bul olqylyqty retke keltirý bólim basshylaryna tapsyryldy. Ol úshin ákim jaýaptylarǵa eki aı ýaqyt berdi. Sondaı-aq, árbir aıaldamaǵa avtobýstyń jaqyndaǵanyn bildiretin qurylǵy ornatýy kerektigin atap ótti.
«Bul joba júzege assa, turǵyndar smartfonnyń kómegimen qoǵamdyq kóliktiń qozǵalysyn baqylaı alady»,-dedi ákim.
Jıynda qalalyq jolaýshylar kóligi jáne avtomobıl joldary bóliminiń basshysy Qýatjan Jumataev jolaýshylar tasymaldaıtyn kompanııa basshylary da jeke kólikterin tastap, ózderi qyzmet etetin baǵyttarda avtobýspen júrgenin aıtty. Nátıjesinde olar da jumys barysyndaǵy kemshilikterdi anyqtaýda eken.
