Shymkenttikter «Men qazaqsha sóıleımin» aktsııasyna belsene qatysýda
Memlekettik tildiń mártebesin kóterýdi jáne túrli etnos jastary arasynda qazaqsha sóıleý mádenıetin arttyrýdy kózdegen aktsııa barysynda Shymkent etnomádenı birlestikteri janyndaǵy jastar qanatynyń músheleri belsendilik tanytyp otyr. Olar qoǵamdyq oryndarda aktsııanyń sımvolıkasy bar únparaqtar men aqparattyq flaerler taratyp, «Qyzǵaldaq» sýburqaǵy janynda «Men qazaqsha sóıleımin» taqyrybynda qazaqsha maqal-mátel aıtýdan saıys ótkizdi. Sharaǵa qatysqan 30-ǵa tarta jas Otan, til, dostyq, birlik taqyrybynda maqal-mátel jáne bılerimizdiń danalyq sózderin aıtýdan synǵa tústi. Saıys qortyndysy boıynsha túrik etnomádenı birlestigi janyndaǵy jastar qanatynyń múshesi Ferýza Karıpova men Ońtústik Qazaqstan polıtehnıkalyq kolledjiniń stýdenti Vıktor Evko qatarlastarynan oq boıy ozyp shyqty. Olar Shymkent qalalyq Qazaqstan halqy Assambleıasynyń yntalandyrý syılyqtaryna ıe boldy.
«Qazaq tilin mektepte dostarymnan úırendim. Yqylas qoıyp kirisseńiz, tildi meńgerýdiń qıyndyǵy joq. Al, memlekettik tildi bilý - barsha qazaqstandyqtardyń mindeti ári ómir talaby, zaman suranysy, qoǵam qajettiligi. Sondyqtan, qazaq tilinde ótetin baıqaýlarǵa jıi qatysamyn. Osy arqyly qazaq tilinde sóıleý mádenıetimdi damytýdy kózdeımin. Qazirgi tańda qazaqtyń otyzdan astam maqal-mátelderin jatqa bilemin. Aldaǵy ýaqytta qazaq oıshyldarynyń danalyq sózderin jattamaqpyn», - deıdi baıqaýda belsendilik tanytqan Vıktor Evko.
Іs-shara sońynda jastar Shymkent qalalyq tilderdi oqytý-ádistemelik ortalyǵy daıyndaǵan júzden asa únparaqty qala turǵyndaryna taratty.
Aıta ketý kerek, 29 qazannan bastaý alǵan aktsııa qarasha aıynyń sońyna deıin jalǵasady.
