Shymkenttikter qala kúninde baýyrsaq pisirýden rekord ornatty
ShYMKENT. QazAqparat - Shymkenttikter baýyrsaq pisirýden rekord jasady. Qala kúni aıasynda «Altyn dán» kompanııasy Shymkent qalalyq ákimdiginiń qoldaýymen 1136 keli baýyrsaq pisirdi, dep habarlaıdy QazAqparat tilshisi.
Naýryz alańynda Qazaqstannyń «KInES» rekordtar kitabynyń jańa rekordy tirkeldi. 1 tonnadan astam baýyrsaqty qalanyń úzdik 20 aspazy ázirledi. Rekord jasaý úshin 750 keli un, 400 lıtr maı, 60 keli qant pen 150 lıtr sút jumsaldy.
Baýyrsaq 10 qazanda pisirildi. Al salmaǵy arnaıy qazanda ólshendi. Jańa rekord ornatylǵany týraly arnaıy sertıfıkatty kompanııa ókilderine oblys ákimi Janseıit Túımebaev pen qala ákimi Ǵabıdolla Ábdirahymov tapsyrdy. Al rekord tirkelgen soń, baýyrsaq qonaqtarǵa taratyldy. Bul kúni merekege 30 myńnan astam adam qatysty.
Eske salaıyq, buǵan deıingi rekord Almaty qalasynda tirkelgen bolatyn. Onda 856 keli baýyrsaq pisirilgen edi.
