Shymkenttikter gaz baǵasynyń qymbattaýyna qarsy boldy
Qoǵamdyq belsendiler men túrli partııa ókilderi, qala turǵyndary qatysqan jıynda óńirdiń monopolııaǵa qarsy departamentiniń basshysy Baqtııar Atalyqov jurtty óz pikirin ashyq aıtýǵa shaqyrdy.
Onyń sózinshe, osynda aıtylǵan usynystar men halyqtyń pikiri tıisti komıtetke jetkizilip, soǵan sáıkes sheshim qabyldanatyn bolady. Osydan keıin jınalǵan qaýym baǵany 4 teńgege qymbattatý bylaı tursyn, qazirgi 34 teńgeniń ózi qarapaıym halyqtyń qaltasyna aýyr tıip otyrǵanyn jetkizdi. Máselen, Ózbekstannan gaz tutynatyn óńirde kógildir otynnyń baǵasy Tarazdan qymbattap ketken.
«Ne sebepti, ózbek elimen kórshi turǵan oblys Tarazdan jaqyn bola tura gaz baǵasyn qymbat tarıfpen tóleýi tıis,- deıdi shymkenttikter.
Al, kógildir otyn taratýshy kompanııa ókilderi munyń sebebin Taraz qalasynyń Ózbekstandaǵy gaz shyǵatyn orynǵa jaqyn ornalasýymen túsindiredi. Shymkent qalasy ol jerden alystaý bolǵan soń, tasymaldaý esebinen baǵasy kóterińki eken. Keler jyly tasymaldaý quny 200 teńgege, ıaǵnı 8323 teńgeden 8060 teńge 71 tıynǵa tómendeıd. Soǵan qaramastan gaz taratýshy mekeme «QazTransGazAımaq» kompanııasynyń jergilikti ókilderi tarıfti kóterý qajet dep otyr. Olardyń bul usynysyn oblystyń jaýapty sala basshylary túsindirip ketti.
«Bizde 14 myń shaqyrymnan asa gaz qubyrlary tartylǵan. Onyń tek 6 myń shaqyrymy ǵana gaz taratýshy mekemelerge qarasty. Qalǵan qubyrlardy kútip qaraýǵa qosymsha jumys kúshi qajet, ıaǵnı mamandar sanyn kóbeıtý kerek. Olarǵa jalaqy tóleý kerek bolady. Sondyqtan gaz taratýshy mekeme tarıfti 4 teńgege kóterý týraly usynys jasap otyr. Alaıda oblystyq ákimdik baǵany kóterýge qarsy ekenin jetkizgim keledi»,-dedi Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Marǵulan Maraıym.
Jıyn qortyndysynda qoǵamdyq qabyldaýǵa kelgender gaz baǵasynyń 4 teńgege qymbattaýyna biraýyzdan qarsy boldy. Endi jıynnyń qortyndysy boıynsha arnaıy hattama toltyrylyp, elimizdiń monopolııaǵa qarsy komıtetine joldanatyn boldy.
