Shymkenttikter avtobýstardyń qozǵalysyn smartfonnyń kómegimen baqylaıdy
ShYMKENT. QazAqparat - Shymkentte qoǵamdyq kólikterdi baqylaýǵa arnalǵan mobıldi qosymsha iske qosylady. Endigi jerde qala halqy men qonaqtary ózine qajetti qoǵamdyq kólikterdiń qaı jerde kele jatqanyn, qansha ýaqytta jetetinin qolyndaǵy smartfonnyń kómegimen bile alady. Bul týraly qala ákiminiń orynbasary Qaırat Nurtaıdyń qoǵamdyq kólik kompanııalarynyń basshylarymen kezdesýinde málim boldy, dep habarlaıdy QazAqparat tilshisi.
Jıynda qalalyq jolaýshylar kóligi jáne avtomobıl joldary bóliminiń basshysy Qýatjan Jumataev qoǵamdyq kólik máselesi boıynsha atqarylǵan jumystar jóninde baıandama jasady. Onyń aıtýynsha, birqatar kompanııalarda qoǵamdyq kólikterdi baqylap otyratyn GPS ornatylmaǵan. Atalǵan máselege jaýapty kompanııa basshylary bir apta ishinde olqylyqtardyń ornyn toltyrýǵa ýáde berdi.
«GPS barlyq avtobýstarda ornatylýy kerek. Biz ol arqyly árbir qoǵamdyq kólikti baqylap otyramyz. Eger qurylǵyńyz istemeı qalsa jumysyńyz kórinbeı qalady. Sondyqtan bul máseleni erterek túzetý kerek. Buzylǵandaryn jóndep, jańasyn satyp alýǵa bir apta ýaqyt beriledi», - dedi Qaırat Nurtaı.
Sondaı-aq, jıyn barysynda qoǵamdyq kólikterdegi bılet bermeý, júrgizýshilerdiń jol erejesin buzýy, aıaldamaǵa toqtamaý, kondýktorlardyń aıqaılaýy sekildi máseleler de talqylandy. Kólik kompanııalary tarapynan jiberilgen kemshilikter sóz boldy. Kezdesý sońynda qala ákiminiń orynbasary kompanııa basshylaryna birqatar mindetter júktep, naqty tapsyrmalar berdi.
