Shymkenttik júrgizýshiler qarapaıym erejelerdi saqtamaıtyny anyqtaldy
ShYMKENT. QazAqparat - Shymkentte eki kún ishinde myńnan astam jol erejesin buzý deregi tirkelgen. Jergilikti polıtsııa qyzmeti uıymdastyrǵan reıdtik sharada júrgizýshilerdiń qarapaıym erejelerdi saqtamaıtyny anyqtaldy, dep habarlaıdy QazAqparat HAA tilshisi.
"Daýyl" atty reıdtik shara barysynda polıtseıler táýlik boıy kúsheıtilgen tártipte kezekshilikke shyǵyp, qala kóshelerin baqylaýda. Kóliktegi ekıpaj ben jaıaý quram jáne velopolıtseıler de osy sharaǵa jumyldyrylǵan. Qoǵamdyq tártipti baqylaý jumystary polıtsııa beketterinde de júrgizilýde. Nátıjesinde kólik tizgindegenderdiń rólde otyryp, uıaly telefonmen sóılesý, qaýipsizdik beldigin taqpaý sııaqty zańbuzýshylyqtarǵa jol beretini anyqtaldy. Endi biri tipti baǵdarshamnyń belgisin elemeı, ruqsat etilmegen jerge kóligin qoıyp ketken. Eki táýlik ishinde 1138 ereje buzý deregi tirkelip, olarǵa qatysty ákimshilik hattamalar toltyryldy. 253 júrgizýshi baılanys quralyn paıdalanǵany úshin aıyppul tólese, 227 turǵyn beldik taǵý sııaqty saqtyq sharalaryn qolǵa almaǵany úshin jazalandy. 129 kólik tizgindeýshi terezesin kúńgirttep alǵany úshin shyǵyndalsa, 14 júrgizýshiniń rólge masań kúıde otyrǵanyn anyqtalǵan. Olardyń isi endi ákimshilik sotta qaralady. Budan bólek 91 temir tulpar aıypturaqqa jóneltilgen.
Jergilikti polıtsııa qyzmeti basshysy Danııar Meıirhannyń sózinshe, reıdtik shara taǵy 10 kún boıy júrgiziledi. Sondyqtan polıtseı Shymkenttiń júrgizýshilerin tártip buzbaýǵa shaqyrdy.
