Shymkenttik júrgizýshi jaıaý adamdy qaǵyp, oqıǵa ornynan qashyp ketken
ShYMKENT. QazAqparat - Shymkentte júrgizýshi jaıaý júrginshini soǵyp, oqıǵa ornynan qashyp ketken. Júrginshini mert qylǵan júrgizýshini polıtseıler kóp uzamaı-aq ustap aldy, dep habarlaıdy QazAqparat HAA tilshisi.
Oqıǵa Shymkenttyń irgesindegi Qyzylsý eldimekeninde tańǵy 5.30-dar shamasynda bolǵan. Belgisiz avtokólik jaıaý júrginshini qaǵyp ketip, oqıǵa ornynan izin sýytady. Jol-kólik oqıǵasyna kináli júrgizýshini ustaý maqsatynda Qarataý, Tólebı jáne Saıram AІІB-niń jeke quramyna baǵyttama berilgen. Jol-patrýldik polıtsııa qyzmetiniń barlyq kúshin jumyldyrǵan. Nátıjesinde dál sol kúni keshke 1998 jyly týǵan júrgizýshi ustaldy. Ol «ford-tranzıt» avtokóligin tizgindegen bolyp shyqty. Kúdikti sol kúni-aq qamaýǵa alynyp, tıisti sot-medıtsınalyq saraptama taǵaıyndaldy.
Óńirdiń tártip saqshylary qaza bolǵan azamattyń 68 jastaǵy jergilikti turǵyny ekenin anyqtady. Atalǵan jaıt boıynsha Qylmystyq kodekstiń eki babymen (345 «Kólik quraldaryn júrgizýshi adamdardyń jol qozǵalysy jáne kólik quraldaryn paıdalaný erejelerin buzý» jáne 347 «Jol-kólik oqıǵasy bolǵan jerden ketip qalý») is qozǵalyp, tergeý sharalary júrgizilýde.
