Shymkenttik jigitter býkmekerlik keńse ashý úshin ózge keńselerdi tonaǵan
ASTANA. QazAqparat - Shymkent qalasynyń polıtsııasy jedel-izdestirý sharalary arqyly bir aıda tórt býkmekerlik keńseni tonaǵan úsh jas jigitti ustady. Onyń úsheýi Shymkent qalasynyń jáne bireýi Ordabasy aýdanynyń 1992, 1994 jáne 1995 jyly týǵan turǵyndary.
28 qyrkúıek kúni kúdiktiler Shymkent qalasynda ornalasqan býkmekerlik keńsegege urlanyp kirip, teledıdar, kassalyq apparat,kompıýter jáne aqshany tonap áketken. Keltirilgen shyǵyn 700 myń teńgeden asqan.
23 qazan kúni Shymkent qalasy, Jaılaý shaǵynaýdanynda ornalasqan býkmekerlik keńsege urlyqqa túsken qaskóıler oıyn termınaldary men 1,5 mıllıon teńgeden asatyn qarajatty jymqyrǵan.
26 qazan kúni kúdiktiler Jańa shahar shaǵynaýdanyndaǵy býkmekerlik keńseden barlyq tehnıka men 2 mıllıon teńgeden asatyn qarajatty tonaǵan. Birneshe kúnnen soń, olar B.Momyshuly kóshesindegi býkmekerlik keńseniń termınaldaryn, kompıýterlik tehnıkalaryn, jıhaz, teledıdar men kassadaǵy aqshany urlap áketken. Jábirlenýshi jalpy kólemi 4 mıllıon teńge shyǵynǵa ushyraǵan.
Polıtsııanyń anyqtaýynsha, ustalǵandar tonalǵan zattar arqyly býkmekerlik keńse ashýdy josparlaǵan. Kúdiktiler keltirgen shyǵynnyń jalpy kólemi 8 mıllıon teńgeden asady. Qazirgi ýaqytta polıtsııa urlanǵan múliktiń bir bóligin zańdy ıelerine qaıtaryp berdi. Osy boıynsha QR QK 188-baby boıynsha qylmystyq is qozǵaldy. Kúdiktiler qamaýǵa alyndy. Sotqa deıingi tergeý amaldary júrip jatyr. Barlyq býkmekerlik keńsede beınebaqylaý kameralary, «dabyl núktesi» sekildi qaýipsizdik quraldarynyń bolmaǵanyn, kúdiktilerdiń osy múmkindikti paıdalanǵanyn atap ótken jón. 
