Shymkenttik túlekter saltanatty keshterden bas tartyp jatyr
Qalalyq bilim basqarmasynyń málimetinshe, aǵymdaǵy jyly 8104 bitirýshi mekteppen qoshtasady. Sońǵy qońyraý kúni túlekterdiń túrli keleńsiz jaǵdaılarǵa ushyrap qalmaýy úshin birqatar sharalar qolǵa alynýda. Atap aıtqanda, Polıtsııa departamenti men qonaq úılerdiń basshylary, mektep dırektorlary men ata-analar komıtetiniń tóraǵalary bas qosyp, biraýyzdan keshterdi mektepterde ótkizý týraly kelisimge keldi.
Qaýipsizdikti qamtamasyz etý jáne quqyq buzýshylyq pen jazataıym oqıǵalardyń aldyn alý maqsatynda ár mektepte 10-nan, qala boıynsha 1400-ge jýyq polıtsııa qyzmetkeri táýlik boıy kezekshilik uıymdastyratyn boldy. Óz kezeginde túlekter de elimizdiń Bilim jáne ǵylym mınıstri K.Shámshıddınovanyń bitirý keshterin mektepterde ótkizý týraly usynysyn negizge ala otyryp, Nur-Sultan qalasyndaǵy jastardyń mektep bitirý keshterine arnalǵan chelenjdi jalǵastyrmaq.
Osy maqsatta mektep túlekteri arasynda kóshbasshylar keńesi ótkizilip, mektepti bitirý keshin tıimdi uıymdastyrý boıynsha úndeý qabyldandy. Onda keshti 11 jyl oqyǵan altyn-uıa mektepte ótkizý, qymbat kóliktermen avtosherý jasaýǵa tıym salý, meıramhanalar men toıhanalarda arnaıy keshter ótkizbeý jáne salaýatty ómir saltyn qalyptastyrý máseleleri qarastyrylǵan. Sondaı-aq, jas órenderge ónege bolý maqsatynda mektep kitaphanasyna kitap syılaý aktsııasyn uıymdastyrý isi qolǵa alynbaz. Búginde bilim berý uıymdary tarapynan ata-analarǵa da túsindirý jumystary júrgizilip, ul-qyzynyń bitirý keshin mektepte ótkizý týraly úgit - nasıhat jumystary júrgizilýde.