Shymkenttik tártip saqshylary jaraqattansa da óz erikterimen qaıta jumysqa shyǵyp jatyr
Jappaı tártipsizdik kezinde qyzmet atqaryp júrgen 45 polıtsııa qyzmetkeri ártúrli dene jaraqattaryn alǵan. Onyń ishinde 2 qyzmetker aýrýhananyń jansaqtaý bóliminde bolyp, qazirgi ýaqytta arnaıy baqylaýdaǵy palataǵa aýystyryldy. Alynǵan túrli jaraqattaryna qaramastan, bul qyzmetkerlerdiń barlyǵy óz erikterimen turǵyndardyń tynyshtyǵy úshin áriptesteriniń qatarynan tabylatynyn jetkizip, qyzmetterine qaıta oralyp jatyr. Atap aıtqanda, dárigerdiń baqylaýynda bolýy tıis tártip saqshylary, aıaq-qoldarynyń aýyr jaraqat alǵanyna qaramaı, jappaı tártipsizdik oryn alǵan qala ákimdigi ǵımaratynyń aldyna azamattardyń qaýipsizdigin kúzetý úshin qaıta shyǵyp, jumys isteýde. Solardyń biri – Patrýldik polıtsııa polkiniń vzvod komandıri Baýyrjan Qasymov. Polıtsııa aǵa leıtenantynyń oń qolyna tas tıip, synǵan. Dárigerler oǵan eńbekke jaramsyzdyq paraqshasyn ashsa da, áriptesteriniń janynan tabylyp, jumysyn atqarýda. «6-qańtar kúni buzaqylardyń biri maǵan qaraı úlken tas laqtyrdy. Qorǵaný maqsatynda betimdi qolymmen japqan kezde, tas qolyma tıip, alaqanym synǵan. Jedel járdemmen emhanaǵa jetkizip, onda qolyma gıps saldy. Men birden qyzmetime qaıta oraldym. Bul is-áreketimdi erlik dep sanamaımyn. Kez kelgen polıtseıdiń mindeti dep bilemin. Qazaqstan Respýblıkasyna qyzmet etemin!» - deıdi ol. Qazirgi tańda Shymkent qalasyndaǵy jaǵdaı qalypty. Quqyqqorǵaý organdarynyń qyzmetkerlerimen qala aýmaǵy tolyǵymen baqylaýǵa alynyp, zań buzýshylyqtardy boldyrmaý maqsatynda is-sharalar júrgizýde.
