Shymkenttik «tankıst» qala turǵyndarynan keshirim surady
Shymkenttik polıtseıler Jeńis kúni qurmetine avtokóligin T-34 tankisine uqsatyp ózgertip, jabdyqtap alǵan júrgizýshiniń kim ekenin anyqtady. Megapolıs turǵyndary Hyundai kóligi ıesiniń ıdeıasyna árqıly baǵa bergen. Al júrgizýshiniń sózine qulaq túrsek, ol jol erejesin buzam dep oılamaǵan.
«Polıtsııa qyzmetkerlerine alǵys aıtamyn. Meni búgin polıtsııa ýchaskesine shaqyryp, bárin túsindirdi. Olar jol ústinde mundaı áreketke tyıym salynǵanyn aıtty. Sosyn polıtseıler meni qoıa berdi. Tártip saqshylaryna kóp rahmet. Shymkent turǵyndarynan keshirim suraımyn», - deıdi Hyundai júrgizýshisi.
Aıta keteıik, QR Jol qaýipsizdigi erejelerinde avtokólikti tıisti ruqsat almaı, óz betinshe ózgertýge, qaıta jabdyqtaýǵa tyıym salynǵan. Bul jaǵdaıda qosymsha zattar júrgizýshi otyrǵan jerden kórýdi shektep, jol qozǵalysyna qatysýshylardyń jaraqat alý qaýpin týǵyzýy múmkin. Jol qaýipsizdigi erejelerin buzǵan jaǵdaıda aıyppul salynady.
Eske sala keteıik, Jeńis kúni áleýmettik jelilerde tankige uqsatyp jabdyqtalǵan kóliktiń vıdeosy taraǵan bolatyn.