Shymkenttik sheneýnikter bıýdjet aqshasyn jymqyrýdyń taǵy bir jolyn tapty

ASTANA. QazAqparat - Ońtústik Qazaqstan oblysynda memlekettik baǵdarlama aıasynda adamdardy jumysqa turǵyzý arqyly bıýdjet qarjysyn jymqyrý faktileri anyqtaldy. Alaıda jumys bergen barlyq kásiporyndar jalǵan bolyp shyqty, dep xabarlaıdy QazAqparat tilshisi.

«Atalǵa qylmys Shymkent qalasynda anyqtaldy. Oǵan qalanyń jumyspen qamtý jáne áleýmettik baǵdarlamalar bólimi, ishki ister jáne basqa da memlekettik organdardyń qyzmetkerleri qatysty. Olar «jeke kásipkerdiń» atymen 100-den astam kásiporyn ashyp, sonyń bárine adamdardy jumysqa turǵyzǵan. Sol úshin memlekettiń aqshasyn alǵan. Al, shyn máninde, eshqandaı jumys oryndary da bolǵan joq. Búginde «Qoǵamdyq jumys oryndary» baǵdarlamasyna 308 adamnyń qatysqany anyqtaldy», - dedi QR Memlekettik kirister departamenti Ekonomıkalyq tergeýler qyzmetiniń ókili Arman Esembaev búgingi baspasóz máslıxatynda.

Onyń aıtýynsha, tergeý kezinde qylmystyq toptyń bir múshesinen 88 mórtaban, jeke kásipkerlerdiń atyna ashylǵan 68 bank kitapshasy jáne 188 adamnyń bank kartasy tárkilendi. Qazirgi kezde sotqa deıingi tergeý amaldary jalǵasýda. Memleketke kelgen shyǵynnyń jalpy somasy anyqtalyp jatyr.

Aıta keteıik, sońǵy alty aıdyń ishinde ekonomıkalyq qylmystar boıynsha memleketke kelgen shyǵyn 151,5 mlrd teńgeni qurady. Atalǵan qarjynyń bári áleýmettik baǵdarlamalarǵa arnalǵan bolatyn. Ol aqshaǵa shamamen 70 mektepti nemese 80 balabaqshany turǵyzýǵa, nemese 40 aýrýxanany salyp, ony tolyǵymen qajetti qural-jabdyqtarmen qamtamasyz etýge bolatyn edi.