Shymkenttik sheneýnik jolǵa bólingen 747 mln teńgeni jymqyrǵan

NUR-SULTAN. QazAqparat – Jyl basynan beri jol salasyndaǵy jemqorlyq boıynsha 15 qylmystyq is qozǵalǵan. Bul týraly Sybaılas jemqorlyqqa qarsy is-qımyl agenttigi Aldyn alý qyzmetiniń basshysy Saıan Ahmetjanov onlaın brıfıngide aıtty, dep habarlaıdy QazAqparat tilshisi.

«2021 jyly sybaılas jemqorlyqqa qarsy qyzmeti 18 sotqa deıingi tergeý ashqan bolsa, bıyl jartyjyldyqtyń ózinde ǵana 15 sotqa deıingi tergeý júrip jatyr. Munyń bári –qylmystyq ister. Onyń kóbi aqsha jymqyrý, paraqorlyq laýazymdyq ókiletin paıdalaný baptarymen baılanysty», - degen agenttik ókili birneshe mysal keltirdi.

«Mysaly sybaılas jemqorlyqqa qarsy qyzmettiń óndirisinde Batys Qazaqstan oblysynyń Jolaýshylar kóligi jáne avtomobıl joldary basqarmasy basshynyń ústinen qozǵalǵan is jatyr. Ol jalpy somasy 180 mln teńgeden asatyn jumystardyń oryndalǵany týraly jalǵan aktige qol qoıdy degen kúdikke ilindi. Kúrdeli jóndeý nysany – «Nurly jol» baǵdarlamasanyń aıasynda qarjy bólingen «Bórili-Aqsaı-Jympıty» baǵytyndaǵy jol.

Sondaı-aq Shymkent qalasynyń Jolaýshylar kóligi jáne avtomobıl joldary basqarmasy basshysy men ózge tulǵalardyń ústinen de qylmystyq is tergelip jatyr. Olar byltyr qazan aıynda memleket bıýdjetin ysyrap etý arqyly 747 mln teńgeden astam qarajatty jymqyrǵan. Munda da qarajat «Nurly jol» baǵdarlamasy arqyly bólingen», - dedi Saıan Ahmetjanov.