Shymkenttik sheneýnik Danııar Alannyń qyzmetinen ketýine ne sebep boldy

ShYMKENT. QazAqparat - Shymkenttik sheneýnik Danııar Alan óz erkimen qyzmetinen ketti. Bul týraly qala ákiminiń baspasóz hatshysy Araı Esenbek málimdedi, dep habarlaıdy QazAqparat tilshisi.

Araı Esenbektiń aıtýynsha, Shymkent qalalyq Jastar rerýrstyq ortalyǵy basshysynyń burynǵy orynbasaryna eshqandaı qysym jasalmaǵan.

«Ol jumystan ketetini týraly sheshimdi ózi qabyldady. Bul jerde onyń úsh jyl burynǵy Telegram-kanalyndaǵy áıelder týraly jazbasynyń qatysy joq. Ol jazba - óziniń jeke pikiri»,- dedi Araı Esenbek.

Aıta keteıik, buǵan deıin sheneýniktiń áıelderge qatysty jazbasy áleýmettik jelilerge tarap ketken bolatyn. Ondaǵy pikiri jurtshylyqtyń narazylyǵyn týǵyzǵan.

Keıinnen Danııar Alan bul jazbasynyń úsh jyl buryn jazylǵanyn, onyń qazirgi jaǵdaıǵa esh qatysy joq ekenin aıtyp túsindirgen.

«Álgi shý bolǵan post Telegramda jazylǵan. 2017 jyly. Kimge, ne úshin arhıv qoparýdyń qajeti bolǵanyn bilmedim, biraq shyǵyp ketipti. Túsindirip kóreıin. Telegram kanal taza ózim úshin ashylǵan. Ózimniń oılarymdy, basymnan ótkenin keıde qaljyń, keıde shynymen jazyp otyramyn. Dál sol postty ózgelerdiń qate túsingeni úshin keshirim suraıyn. Onan soń jumys pen jeke ómirdi ajyrata bilý kerek dep oılaımyn. Oflaında kórgen, tanys-bilis adamdardyń men týraly pikirin tyńdap, zerttep, zerdelep, sosyn ǵana adam týraly qorytyndy shyǵarsańyzdar. Eger jumysyma baılanysty kez kelgen suraq boıynsha kez kelgenińiz kelip surap, sonan soń meniń jumysyma baılanysty kinárat aıtsańyzdar, ol - basqa áńgime.

PS: Keshe aıtqanmyn. Túsirilgen rolıkti menimen baılanystyrmańyzdar. Kinálini basqa jaqtan izdeńizder» delingen sheneýniktiń jeke paraqshasynda.

Eske salaıyq, buǵan deıin Danııar Alan qyzmet atqarǵan Shymkent qalalyq Jastar resýrstyq ortalyǵy qysqa beldemshe kıgen qyzdyń vıdeosyn jarııalap, synnyń astynda qalǵan edi. Onda qysqa ıýbka kıgen qyzǵa taksı júrgizýshisi «jezókshege uqsaısyń» dep aıtqany belgili. Bul sóz jurttyń narazylyǵyn týǵyzyp, jelide qyzý talqylanǵan. Keıinnen bul rolık YouTube áleýmettik jelisinen alynyp tastaldy.

Al, qalanyń shendileri bolsa atalǵan beınerolıkti túsirýge memlekettik tapsyrys bermegenin aıtyp túsindirgen bolatyn.