Shymkenttik polıtseıler izdeýde júrgen 23 qylmyskerdi ustady
Memleketaralyq quqyq qorǵaý organdarynyń qatysýymen uıymdastyrylǵan operatsııa kezinde iz-túzsiz joǵalǵan 16 azamat pen izdeý jarııalanǵan bir adamnyń máıiti tabylǵan. Sondaı-aq, polıtseılerden qashyp júrgen 23 qylmysker ustalǵan. Osylaısha izdeýde júrgen 40 adam anyqtaldy.
Qalalyq PD baspasóz qyzmetiniń málimetinshe, atalǵan shara asa aýyr qylmys jasaǵan qylmyskerlerdi izdestirý tıimdiligin arttyrý maqsatynda ótkizilgen. Máselen, operatsııa barysynda Reseı Federatsııasynda qylmys jasaǵan degen kúdikke ilingen Qazaqstan Respýblıkasynyń azamaty anyqtalyp, qolǵa tústi. Qazirgi tańda ony kórshi elden ekstradıtsııalaý boıynsha jumystar júrgizilýde. Taǵy bir qylmysker Reseıde qylmys jasap, jasyrynyp júrgen bolatyn.
«Reseı Federatsııasynyń Tomsk qalasynda 2018 jyldan beri izdeýde júrgen. Ol esirtki zattaryn ótkizip, tasymaldaǵany úshin aıyptalǵan. Qylmyskerdi 13 naýryzda Shymkent qalasynda Krımınaldyq polıtsııa qyzmetkerleri ustady. Qazirgi tańda ol qamaýǵa alynyp, Reseıge ekstradıtsııalaý máselesi qarastyrylyp jatyr» delingen habarlamada.
Ustalǵandardyń arasynda adamdardy zańsyz satýmen aınalysqan Ózbekstan Respýblıkasynyń azamaty da bar. Búginde ol qamaýǵa alynyp, jaqyn kúnderi Ózbekstan Respýblıkasyna ekstradıtsııalanady dep kútilýde. Sondaı-aq, Shymkenttik polıtseıler iz-túzsiz joǵalǵan jergilikti jerdiń 50 jastaǵy turǵynyn Máskeý qalasyndaǵy aýrýhanalardyń birinen tapqan. Qazirgi tańda ol azamat jaqyn týystarymen tabysty.