Shymkenttik polıtseı qoǵamdyq qaýipsizdikti saqtaý úshin jastardy jumysqa shaqyrdy
ShYMKENT. QazAqparat - Shymkenttik polıtseı qoǵamdyq qaýipsizdikti birlesip saqtaýǵa shaqyrdy. Jergilikti polıtsııa qyzmetiniń jetekshisi qala turǵyndarynan kómek surap, áleýmettik jelige jarııalaǵan, -dep habarlaıdy QazAqparat HAA tilshisi.
Óziniń jeke paraqshasynda Danııar Meıirhanov qoǵamdyq qaýipsizdikti saqtaýǵa kelgisi keletinderge arnaıy tigilgen bas kıim men sómke, jeletkalar beriletinin aıtqan. Sondaı-aq ol bul kıimderdi ózi kıip kórsetti.
«Bizdiń qalamyzdy qaýipsiz qylýǵa kómekteskenderge osyndaı bas kıim, sómke jáne jılet beremiz. Úıde nemese jyly keńsede otyryp polıtseılerdiń jumysyn jamandaý óte ońaı. «Kóshedegi tártipke óz deńgeıinde qaramaıdy, jasóspirimdermen qyzmet atqarmaıdy nemese urylardy ustamaıdy» dep. Endi árkimde polıtseılermen birqatarda turýǵa múmkindik bar. Oblystyq prokýratýranyń tapsyrmasymen qalalyq ákimshilik pen Jergilikti polıtsııa qyzmeti qoǵamdyq kómekshilerdi birlesip qyzmet atqarýǵa shaqyrady. Barlyǵy eńbegi úshin tólemaqyny jumys pen qamtý ortalyǵy arqyly alady»,-dep jazady D.Meıirhanov.
Sondaı-aq ol kómekshi bolǵysy keletinderge tómendegi talaptar qoıylatynyn aıtqan. Máselen, ol azamat joǵary bilimdi ári jasy 29-dan aspaýy tıis. Jalaqysy 56 myń teńge kóleminde bolady eken. Al, orta bilimi bar azamattarǵa 40 myń teńge tólenedi.
«Qosymsha aqparat alý úshin Shymkent qalasy Qojanov kóshesinde ornalasqan burynǵy jol polıtsııasy ǵımaratyndaǵy Shymkent qalasynyń Jergilikti polıtsııa qyzmetine habarlasyńyzdar. Jeke kýálikpen 209 qyzmet bólmesine kelý qajet. Baılanys telefondary: 8 707 145 31 45 jáne 8 702 840 26 17», - deıdi Jergilikti polıtsııa qyzmetiniń jetekshisi.
