Shymkenttik para-kanoıst «Qazaqstan halqyna» qorynan ınnovatsııalyq aıaq protezderin aldy
Jaqynda ol buıymdy shyǵarýshy kásiporyn keńsesinde protezderiniń ólshemin sáıkestendirip, synaqtan ótkizdi. Jańa protezin alyp, aldaǵy para-kanoe boıynsha jarystarǵa daıyndyqty pysyqtaı bastady. Aldyńǵy protezin Bıbarys alty jyl buryn alǵan.
«Eski protezim zalda ótkizetin jattyǵýlarǵa, sonyń ishinde sýǵa tózimdi bolý úshin aqsha qosyp, kúsheıttim. Alty jyl kıip júrdim, endi jańa protez kerek boldy. Qordyń baǵdarlamasy týraly estip, ótinim bergennen keıin kóp uzamaı maquldaý aldym. «Qazaqstan halqyna» qoryna rızamyn», – dep atap ótti Bıbarys Spataı.
Jańa protezderdiń quny 12,1 mln teńge. Bıbarystyń aıtýynsha, bes jasynda «Kamaz» kóliginiń astyna túsip, eki aıaǵynan aıyrylǵan. Sol ýaqyttan bastap protezben ómir súrýde. Besinshi synypqa deıin mektepke baryp, keıin mektepti aıaqtaǵanǵa deıin úı jaǵdaıynda bilim aldy. Kópbalaly otbasydan shyqqan Bıbarysqa jaqyndary únemi belsendi qoldaý tanytyp keldi.
«Ómir boıy protezben júrip kelemin. Biraq mektepte júrgende ata-anam men úshin alańdap, «qulap qalýy múmkin» dep oqýdy úıde jalǵastyrdym. Árıne, eseıgende óz-ózime qarap, derbes boldym. Birinshi kýrsta quqyqtanýǵa tústim, sportpen shuǵyldaný kerek dep sheshtim. Basynda hobbı retinde qaradym. Nátıje kórsetip, aldaǵy múmkindikterdi baıqaǵanymda, oqýymdy támamdap, dene shynyqtyrý bólimine tústim. Jattyqtyrýshym motıvatsııa berdi, para-kanoeny unattym. Birinshilikterge qatysyp, jeńiske jete bastadym», - dedi Bıbarys.
Bıbarys – para-kanoe boıynsha Azııa chempıony, sondaı-aq Tokıo-2020 Paralımpıadasynyń qatysýshysy. Endi ol Parıjde ótetin Paralımpıadaǵa daıyndalýdy josparlap otyr. Kelesi jyly lıtsenzııalar oınatylady. Erekshe adamdardyń áleýmettik beıimdelýi men ózin damytýdyń qajettiligin túsine otyryp, Bıbarys múgedektigi bar árbir adam ózine maqsat qoıyp, oǵan jetýdiń amalyn qarastyrýy kerek dep esepteıdi.
«Mektep kezinde ınternet qazirgideı damymaǵan edi. Úıde otyryp, kóp nárseni bilmeppin. Parasportshylarǵa arnalǵan Olımpıadadan habarym bolmady. Sondyqtan, meniń oıymsha, árkim ózine maqsat qoıyp, ózin esh shektemeı, sol arman-maqsatty júzege asyrý úshin bar kúshin salýy tıis», – dep atap ótti parasportshy.
«Qazaqstan halqyna» qorynyń aqparatynsha, búginde 48 qazaqstandyq Múgedek balalar men jastardy ınnovatsııalyq protezdik-ortopedııalyq buıymdarmen qamtamasyz etý boıynsha qaıyrymdylyq baǵdarlamasy aıasynda protezder alǵan. Baǵdarlamany iske asyrýǵa 1 mlrd 568 mln teńge bólindi.
