Shymkenttik múgedekter tegin beriletin qolarbalardyń sapasyzdyǵyn aıtady
ShYMKENT. QazAqparat - Shymkenttik múgedekter memleket tarapynan berilip jatqan qolarbalardyń sapasyzdyǵyn aıtyp ashynady. Kezekke turyp, biraz ýaqyt kútip beriletin arbalar qozǵalýǵa ıkemsiz, dep habarlaıdy QazAqparat HAA tilshisi.
Taǵdyr jazýymen júrýden qalǵan jandardyń biri Anar Úkibaeva jeti jyl buryn jol apatyna túsken. Sodan beri 1-shi toptaǵy múgedek atanǵan jannyń bar tirshiligi osy bir qozǵaltqysh quralyna baılanyp qalǵan. Eki jyl buryn ol Shymkent qalalyq áleýmettik qamtý ortalyǵyna qolarbamen qamtamasyz etý jóninde ótinish jazady. Suranys hat bir jyldan keıin qanaǵattandyrylady. Alaıda kópten kútken qolarba múldem sapasyz bolyp shyqqan.
«Bergen arbalarynyń dóńgelegi nashar, óıtkeni, dońǵalaqtyń symdary qısaıyp ketedi. Qısaıǵan soń, durys júre almaıdy. Ońǵa, solǵa júrip ketedi. Osydan keıin tıisti oryndarǵa birneshe ret bardym, habarlastym, biraq, esh nátıje shyqpady. Amal joq, men ózim úshin basqa arba satyp aldym, óıtkeni, bul meniń aıaǵym, durys júrip turýym kerek qoı»,-deıdi Anar Úkibaeva.
Al, «Synaq» múmkindigi shekteýli jandardy ońaltý jáne áleýmettik quqyqtaryn iske asyrý, qorǵaý» qoǵamdyq birlestiginiń jetekshisi Murat Jetpisbaevtyń sózinshe, tegin berilgen arbalardyń sapasyzdyǵyn aıtyp kóptegen múgedekter kómek surap keledi eken. Birlestik tóraǵasy olarǵa aýystyryp alýǵa qatysty quqyqtaryn túsindirip, qoldan kelgenshe keńes beremin deıdi. Dese de «Múgedekterdi áleýmettik qorǵaý týraly» Zańyna sáıkes, múmkindigi shekteýli jandardy kreslo-arbamen qamtamasyz etý memlekettik satyp alý baıqaýy arqyly júzege asyrylady. Baıqaý jeńimpazdary bolsa qolarba satyp alarda taýardyń sapasynan góri, sanyna mán berip, pishinin eskermeıdi eken.
« Máselen, dene pishimi kishi adam úlken kolıaskaǵa otyrady, onyń beli maıysady, yńǵaısyz bolady. Dene pishimi úlken adam, kishkentaı arbaǵa otyrsa, ony qajaıdy, jara bolady. Qabiletsiz bolady kóp nársege. Sondaı nárseler eskerile bermeıdi. Eger memleket tarapynan qolarbaǵa bólinetin qarajat sol múgedektiń ózine berilse, onda ol ózine laıyqty, sapalysyn satyp alar edi. Biraq, ony zań kótermeıdi», -deıdi M.Jetpisbaev.
Bul máselege oraı oblystyq jumyspen qamtýdy úılestirý jáne áleýmettik baǵdarlamalar basqarmasynyń mamandary qolarbalardyń sapasyna merdigerler jaýapty ekenin aıtady.
«Memlekettik satyp alý zańyna sáıkes, jeńimpaz bolyp shyqqan merdiger onyń sapasyna jaýap beredi. Al, endi satyp alynǵan qolarbalar sapasy túzilgen kelisimshartqa sáıkes, jeńimpaz merdiger kepildik beredi. Ol kepildik bir jyl ishinde jaramdy bolyp sanalady», - deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń bas mamany Sholpan Ábildaeva.
Búginde elimizdegi múgedekterdiń 17 paıyzy ońtústik óńirinde tirkelgen. Sońǵy 3 jylda qolarbaǵa 664 mıllıonnan astam teńge jumsalǵan. Al, ótken jyly oblysta múgedekterdi qolarbamen qamtamasyz etý úshin 100 mıllıon teńgeden astam qarjy bólinipti.
Aınur Aqbaeva
