Shymkenttik muǵalimderge turǵyn úıdiń sertıfıkaty tapsyryldy

ShYMKENT. QazAqparat -   Shymkentte muǵalimder merekesine oraı baspanaǵa muqtaj muǵalimderge turǵyn úı sertıfıkaty tapsyryldy. Qala ákimi atynan sertıfıkattar berý bilim bóliminiń pılottyq jobasy aıasynda júzege asyrylyp otyr, dep habarlaıdy QazAqparat tilshisi.

Sertıfıkatqa ıe bolǵan ustazdar memlekettik baǵdarlama aıasynda beriletin páter baǵasynyń 10 paıyzdyq alǵashqy jarnasyn tólemeıdi.

Aıta keteıik, qala ákimi Ǵabıdolla Ábdirahymov bıylǵy dástúrli pedagogıkalyq tamyz konferentsııasynda muǵalimderge baspana satyp alýǵa kómektesetinin aıtqan edi. Onda qala basshysy: «Biz «Turǵyn úı jınaq bankiniń» jetekshilerimen kezdesip, bul jóninde talqylaǵan bolatynbyz. Meniń oıymsha, bastapqy jarnany tóleý úshin turǵyn úı sertıfıkatyn qarastyra alamyz» degen bolatyn.