Shymkenttik muǵalimder jumysqa elektrondy túrde qabyldanyp jatyr
ShYMKENT. QazAqparat - Shymkenttik muǵalimder jumysqa elektrondy túrde qabyldanyp jatyr. Bilim bólimindegiler aqparatty tehnologııalar damyǵan zamanda ozyq ádisterdi paıdalanyp, jumystary jeńildep qalǵan, dep habarlaıdy QazAqparat HAA tilshisi.
Bilim berý salasyna engizilgen tyń jańalyq qala ákiminiń uıytqy bolýymen qolǵa alynǵan. Qazir mıllıonǵa tarta turǵyny bar qalada ustazdar tek elektrondy túrde jumys tabýda. Olar burynǵydaı qujattaryn qoltyqtap, ár mektepke barmastan-aq úıinde otyryp-aq ornalasatyn bolǵan. Sebebi, «Jumyspen qamtý týraly» Zań boıynsha árbir mekeme ózderindegi bos jumys oryndary týraly málimetti úsh kún ishinde saıtqa salýy kerek.
«Mekeme bos oryn jarııalaǵan soń, saıtqa mamandyǵy sáıkes keletin tulǵa qujattaryn elektrondy túrde jiberedi. Saıtta qandaı qujattar suraǵanyn sýretke túsirip nemese skanerlep elektrondy túrde joldaıdy. Uıaly telefon nómirin kórsetedi. Sol uıaly telefonyna sms habarlama kelip túsedi», - deıdi Shymkent qalalyq bilim bóliminiń bas mamany Qasymhan Dosjanov.
Qujattar tapsyrylǵan soń qoǵamdyq uıymdar men bilim bóliminiń qyzmetkerlerinen qurylǵan arnaıy komıssııa úmitkermen suhbattasý júrgizedi. Áńgimelesý barysynda muǵalimniń adamı qasıetterine baǵa beriledi. Sóıtip, qıyndyqsyz jumysqa turýdyń múmkindigi týady. Bul kúnde bala sany kóptep tirkelgen shaharda muǵalimderge bos jumys oryndary jeterlik eken.
«Bizde búginde orys synyptaryna sabaq beretin pán muǵalimderine suranys joǵary dep aıtýǵa bolady. Orys tildi bastaýysh synyptarǵa búginde 210 muǵalim kerek. Basqa da hımııa, bıologııa, matematıka boıynsha orys synyptaryna muǵalim bolam deýshiler bolsa, búgingi kúni oryn óte kóp», -deıdi Shymkent qalalyq bilim bóliminiń basshysy Janat Tájıeva.
Óz kezeginde jańa tásil jas mamandar úshin qandaı bos oryndar bar ekenin kórsetetin aqparat alańy sanalyp otyr. Eń bastysy - ashyq, anyq jáne adamı faktor joq.
