Shymkenttik muǵalimder elektrondy qyzmet alýdy jappaı meńgerýde

ShYMKENT. QazAqparat - Shymkentte muǵalimderge elektrondy qyzmet túrlerin alý daǵdylary  úıretile bastady. Tájirıbelik semınardy QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamenti uıymdastyrdy,  dep habarlaıdy QazAqparat tilshisi.

Sharaǵa halyqqa qyzmet kórsetý ortalyǵynyń mamandary men Shymkent qalalyq bilim bólimi basshylary jáne shahardaǵy 130 mekteptiń dırektory qatysty. Sheberlik-sabaq formatynda ótken  basqosý memlekettik qyzmet kórsetý standarttarynyń jaı-japsaryn túsindirý maqsatynda uıymdastyryldy. Arnaıy oqýdan ótken mektep basshylary ınformatıka páni muǵalimderi arqyly óz ujymdaryn  elektrondyq portalda qyzmet alýǵa baýlýǵa múmkindik almaq. memlekettik qyzmetterdi elektrondy túrde túrde alý tásilderi memkyzmet.kz saıtynda ornalastyrylǵan. 

Semınarda sóz alǵan QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamentiniń basshysy Əlı Kómekbaev elektrondy qyzmetti qoldanýdyń adam ómirindegi paıdaly tustaryna toqtaldy.

«Búgingi semınardyń ustazdar qaýymy úshin bereri kóp dep oılaımyn. Muǵalimder osyndaı sharalar arqyly elektrondyq portalda jumys isteý boıynsha joǵary synyp oqýshylarynyń jáne olardyń otbasy músheleriniń tsıfrlyq saýattaryn ashýǵa muryndyq bolady. Jýyrda ǵana oblystyń 8 myńnan astam memlekettik qyzmetshisi úıden shyqpaı-aq, elektrondyq portalda memlekettik qyzmet alýǵa qol jetkizdi.  Endi osy estafetany biz ustazdar qaýymyna usynyp otyrmyz», - dedi Álı Amantaıuly.

Semınardyń mańyzdylyǵyna toqtalǵan Shymkent qalalyq bilim bóliminiń basshysy Janat Təjıeva elektrondy qyzmet kórsetýge baılanysty alda atqarylar jumystardy baıandap, ustazdardy jańa júıede jumys isteýge shaqyrdy. Semınar sońynda qatysýshylarǵa «Ońaı ári jyldam qyzmet al» taqyrybynda jasaqtalǵan aqparattyq paraqshalar taratyldy.