Shymkenttik MÓZ jańǵyrtýdyń birinshi kezeńin aıaqtady
ASTANA. QazAqparat - Shymkent munaı óńdeý zaýytynda zaýytty jańǵyrtý jobasynyń birinshi kezeńiniń iri tehnologııalyq nysany - shıkizatty aldyn ala gıdrotazalaıtyn blogy bar jeńil benzın fraktsııalaryn ızomerleý qondyrǵysynda qurylys-montajdaý jumystarynyń mehanıkalyq aıaqtalǵany týraly aktige qol qoıyldy.
Bul týraly «QMG-ÓM» AQ jáne «PKOP» JShS Qoǵammen baılanys qyzmeti habarlady.
Qondyrǵy taýarly avtomobıl benzınderiniń oktan sanyn joǵarylatýǵa jáne benzın quramynda kantserogendi zat bolyp tabylatyn benzoldyń kólemdik úlesin azaıtýǵa múmkindik beredi. Mehanıkalyq aıaqtaý týraly aktige qol qoıǵan ýaqyttan bastap iske qosý-retteý jumystarynyń kesheni bastalady. Іske qosý-retteý jumystaryn kepildik paıdalaný kórsetkishterine qol jetkizetin bolyp jáne sapaly ónim alynatyn bolyp, aǵymdaǵy jyldyń shildesine aıaqtaý josparlanyp otyr.
Sondaı-aq, jalpy alǵanda zaýytty jańǵyrtý jobasynyń birinshi kezeńi aıasynda qýaty jylyna 4 myń tonna kúkirt óndiretin qondyrǵy salynyp, paıdalanýǵa berildi, árekettegi dızel otynyn gıdrotazalaý qondyrǵysy qaıta quryldy, móldir munaı ónimderin sańylaýsyz quıý qondyrǵysy men zaýyttyń ınfraqurylymynyń basqa da nysandarynyń qurylysy aıaqtaldy.
Jobany júzege asyrý kezinde AQSh-tyń UOP jáne Qytaıdyń SRE sııaqty álemdik jetekshi kompanııalarynyń zamanaýı jáne jańa tehnologııalary paıdalanyldy. Jobalaýshylar retinde Italııanyń Technip kompanııasy men Qazaqstannyń «Kazgıproneftetrans» IK» JShS tartyldy.
Bas merdiger jumystaryn munaıgaz ónerkásibi salasynda ınjınırıngtik jáne qurylys jumystarymen aınalysatyn iri kompanııalardyń biri - China Petroleum Engineering & Construction Corporation oryndaýda.
Jobanyń birinshi kezeńi aıaqtalǵannan keıin Shymkent munaı óńdeý zaýyty Keden odaǵynyń Tehnıkalyq reglamentiniń talaptaryna sáıkes K4, K5 ekologııalyq klastaǵy (Evro-4 jáne Evro-5 standarttarynyń analogy) joǵary oktandy benzınder men dızel otynyn shyǵaratyn bolady. Bul kólik quraldarynyń qorshaǵan ortaǵa shyǵaratyn lastaǵysh zattarynyń mólsherin azaıtý arqyly ekologııanyń jaqsarýyna eleýli úles qosýǵa múmkindik beredi. Zaýytta joǵary oktandy benzınderdi shyǵarý jylyna 460 myń tonnaǵa, dızel otynyn óndirý jylyna 226 myń tonnaǵa, avıaotyndy óndirý jylyna 27 myń tonnaǵa artatyn bolady. Oktan sany tómen AI-80 markili benzıni Qazaqstannyń ishki naryǵyndaǵy qajettilikti qamtamasyz etý úshin shyǵarylýy múmkin.
«PetroQazaqstan Oıl Prodakts» JShS-de Jańǵyrtý jobasy óndiristi toqtatpaı júrgizilip jatqanyn aıta ketken jón.
