Shymkenttik mıllıarder ózinen aqsha bopsalaǵandardy keshirdi
ShYMKENT. QazAqparat - Ońtústik Qazaqstan oblystyq Qylmystyq ister jónindegi mamandandyrylǵan aýdanaralyq sotynda shymkenttik kásipker Serikjan Seıtjanovty bopsalaǵandardyń isi qaralýda. Kezekti sot otyrysynda qazaqstandyq mıllıarder aıyptalyp jatqan seriktesi Bókeıhan Qaıypnazarovqa keshirim beretinin aıtty, dep habarlaıdy QazAqparat tilshisi.
Sotqa jábirlenýshi retinde qatysqan Serikjan Seıtjanov burynǵy seriktesiniń otbasylyq jaǵdaıyn eskere otyryp, oǵan keshirim beretinin aıtty. Sebebi, aıyptalýshy jaýap berý barysynda óziniń eki áıeli men olardan jeti perzenti bar ekenin aıtqan bolatyn.
Sondaı-aq, Kásipker sotqa Bókeıhan Qaıypnazarovtyń aldynda burynǵy beresheginen qutylyp qoıǵanyn, qazirgi tańda qaryz emestigin jetkizdi. ıAǵnı, 1998 jyldary týyndaǵan qaryzdyń ornyna sot sheshimimen Jeltoqsan kóshesindegi 19 úıde ornalasqan ǵımarat berilgen. Alaıda soǵan qaramastan seriktesi bopsalaýyn qoımapty. Dese de aıyptalýshynyń qorǵaýshysy Aıqymbek Bektóreev mılıarder Serikjan Seıtjanovtyń qaryzyn tolyq ótemegenin alǵa tartty.
Eske salaıyq, asa iri kólemde aqsha bopsalaý qylmysy Shymkentte oryn alǵan bolatyn. Bókeıhan Qaıypnazarov esimdi azamat tanymal kásipker Serikjan Seıtjanovtan burynǵy qaryzy 7 mıllıon AQSh dollaryn talap etken. Ol sáýir men shilde aıy aralyǵynda kásipkerdiń uıaly telefonyna birneshe ret habarlama jiberip, iri kólemdegi bereshegin qaıtarmasa, Seıtjanov pen onyń týystaryna qatysty málimetterdi ǵalamtorǵa jarııalaıtynyn jazǵan. Sońynan aıyptalýshy 15 tamyzda aqshany alyp jatqan kezinde qolǵa túsken edi. Onyń qaltasynan 20 myń AQSh dollary tárkilenip, kóliginiń bagajynan 3 mln AQSh dollarynyń mýlıaji tabylǵan. Tergeý barysynda onyń ústinen QR QK 194-babynyń 4-bóligi 2-tarmaǵy «Qorqytyp alý» boıynsha is qozǵalyp, is sotqa ótkizilgen. Eger qylmysy dáleldense, onyń múlki tárkilenip, 7 jyldan 15 jylǵa deıin sottalýy múmkin.
Aıta keteıik, Serikjan Seıitjanov «Forbes» deregi boıynsha elimizdegi elý yqpaldy bızmender tiziminde 18-shi orynda tur. Ol «Saýts-Oıl» seriktestiginiń baqylaý paketi aktsııasyna ıe. Atalǵan kompanııa Qyzylorda óńirinde kómirsýtegi shıkizatyn barlaý jáne óndirý isimen aınalysady.
