Shymkenttik Lıýbov Pochıvalova 30 jyldan beri mergenderdi tárbıelep keledi
Lıýbov Pochıvalova mektep qabyrǵasynda oqyp júrip, muǵalim bolýdy armandapty. Alaıda ol joǵary oqý ornynda sport fakýltetin támamdaǵan. Instıtýtta oqyp júrip, bolashaq ómirlik joldasy, erkin kúresten sport sheberi Vladımır Pochıvalovpen tanysady.
«Jattyqtyrýshy bolý meniń taǵdyrym boldy dep aıtar edim. Men sol kisige turmysqa shyqtym. Ol úılengen kezden keıin-aq meni atý alańyna alyp keldi. Biz birge stend atatyn boldyq. Onyń maǵan alǵashqy syılyǵy da osyndaı sporttyq qarý bolatyn. Maǵan keıinnen sporttyń osy túri qatty unady. Bul ekeýmizdiń otbasylyq súıikti sportymyzǵa aınaldy. Al, 1989 jyldan bastap men kúıeýimniń shaqyrtýymen osynda stend atý boıynsha jattyqtyrýshy bolyp aýystym»,- deıdi úsh ul-qyzdyń anasy.
Ómirden erte ozǵan Vladımır Pochıvalov áıelin únemi ańshylyqqa, balyq aýlaýǵa alyp baryp júrgen. Sóıtip mergendiktiń qyr-syryn tek atý alańynda emes, tabıǵat aıasynda da úıretken. Sodan beri Lıýbov stend atýdy ózi úrenip qana qoımaı, qanshama sportshyny úlken sporttyń dodasyna qosty. Otyz jyldan astam ýaqyt aralyǵynda shákirtteriniń arasynan Álem birinshiliginiń altyn, kúmis júldegerleri, Azııa chempıondary shyqty. Bul kúnde ózi baptaǵan shákirtteri ul-qyzdaryndaı bolyp ketken. Sebebi, árqaısysynyń minez-qulqyn, súıikti taǵamyn, tárbıesin jattyqtyrýshysy jaqsy biledi. Olar da ár jyly 8-shi naýryz merekesinde jattyqtyrýshyny kelip quttyqtap, gúl syılaýdy umytpaıdy.
«Biz jattyǵýǵa balalardy 11 jasynan bastap qabyldaımyz. Bul kezeń bala men jattyqtyrýshynyń bir-birimen úırenisýge óte yńǵaıly kezi. Stend atý adamdy jınaqy bolýǵa, jedel, durys sheshim qabyldaýǵa úıretedi»,- deıdi jattyqtyrýshy áıel.
Qashanda izdenýden jalyqpaıtyn maman ul-qyzdaryn da, nemerelerin de osy sport túrine baýlyǵan. Búginde stend atý sporty onyń januıasynyń bir bólshegine aınalǵandaı.
«Kúıeýim ekeýmizdiń ata-babalarymyz ańshylar, balyqshylar jáne áskerıler bolǵan. Sol qasıet bizdiń de balalarymyzdyń boıynan tabyldy. Máselen, otaǵasy ekeýmiz úılengende barlyq balalarymyz sportpen shuǵyldansa degen armanymyz bolatyn. Qazir sol armanymyzǵa jettik. Bul sport olardyń adam bolyp qalyptasýyna óz ómirden ornyn tabýyna septigin tıgizdi. Nemerelerim biri biri sýda júzýmen, endigi biri sadaq atýmen aınalysady. Qyzym Oksana Sereda da osy sport túrinen jattyqtyrýshy. Ol azııalyq Olımpıada oıyndarynyń altyn júldegeri. Men onyń osy mamandyqty tańdaǵanyna qýanamyn. Atý alaǵyna kelgen shákirtterimdi kórgende kókiregimdi qýanysh sezimi bıleıdi»,- deıdi Lıýbov Pochıvalova.
«Shynymdy aıtsam, qashan zeınetkerlikke shyǵatynymdy ózim de bilmeımin. Qazir mende jattyǵyp júrgen balalar óte kóp. Stend atý sportynan qandaı da bir tájirıbelik oqýlyqtar joq. Sondyqtan men jınaqtaǵan tájirıbemnen kóp sabaq alyp, ózimdi únemi damytýǵa tyrysamyn. Kásibı sportshylardan úırengenimdi balalardyń boıyna sińirýge tyrysamyn. Olarǵa bar bilgenimdi úıretip júrgenime men ózimdi baqytty sanaımyn. Bos ýaqytymda nemerelerime kóp ýaqyt bólýge tyrysamyn. Saıahattap, serýendep, qydyrǵandy da jaqsy kóremin» - deıdi jattyqtyrýshy.
