Shymkenttik qyz-kelinshekterge jeńildetilgen nesıe berile bastady

ShYMKENT. QazAqparat - Shymkenttik qyz-kelinshekter 10 mıllıon teńgege deıin jeńildetilgen nesıe ala alady. Kredıtteýdiń jańa baǵdarlamasyn názik jandylarǵa «Qazaqstan Halyq Banki» AQ usynyp otyr, dep habarlaıdy QazAqparat tilshisi.

Bul bastama «Atameken» QR Ulttyq kásipkerler palatasynyń qoldaýymen júzege asyrylýda. Sala mamandary shym shahar turǵyndaryna jańa baǵdarlamanyń talaptaryn tanystyrdy. Oǵan sáıkes, atalǵan bank áıelderdi, olardyń startap jobalary, aınalym kapıtalyn qarjylandyratyn bolady. Nesıeniń jyldyq paıyzy da tıimdi, nebári 5 paıyzdy quraıdy.

Mamandardyń aıtýynsha, 10 mıllıon teńgege deıingi nesıege jyl sońyna deıin kem degende 100 adam qol jetkizýi tıis. Bank ókilderi bolsa qomaqty qarajat kez kelgen salada júrgen qyz-kelinshekterge beriletinin aıtyp otyr.

«Kásibin júrgizemin degen qyz-kelinshekter aryzdaryn óńirlik Kásipkerler palatasyna ótkize alady. Biz olardy qabyldap, qoldaý kórsetemiz. Atap aıtqanda «Halyq bankke» deıin solardy súıemeldep, nesıe alǵanǵa deıin kómektesemiz.  Osyndaı ótinishterdi názik jandylar «Halyq bankke»  de tikeleı tapsyra alady»,- deıdi Túrkistan oblystyq Kásipkerler palatasy dırektorynyń orynbasary Danııar Dármen.