Shymkenttik qyz-kelinshekterge kúıeýinen qorǵanýdyń ádis-tásilderi úıretilip jatyr
Qorǵanystyń ádis-tásilderin úırenýge kez-kelgen qyz-kelinshek múmkindik aldy. Alǵashqy jattyǵý Shymkenttiń №11-shi sport mektebinde ótti. 50-ge tarta turmystaǵy áıelder men boıjetken prokýratýra organdary ókilderimen kezdesip, bapkerden sabaq aldy.
«Statıstıkalyq málimetterge súıensek, turmystyq zombylyq derekterinde áıelder kúıeýlerinen kóp taıaq jeıdi. Sondyqtan biz joba aıasynda osyndaı jattyǵýlar ótkizýdi qolǵa alyp otyrmyz. 19 men 31 shilde aralyǵynda osy sport mektebinde arnaıy bapkerler qorǵanys ádisterin úırenemin degen názikjandylarǵa jattyǵýlar ótetin bolady», - dedi Abaı aýdandyq polıtsııa bóliminiń aǵa ınspektory Gýlvıra Bektemisova.
Quzyrly organ ókilderimen kezdesýge kelgender er adamǵa qarsylyq kóterip, qol kóterý bizdiń salt-dástúrimizge qarama qaıshy deıdi. Degenmen sońǵy kezderi er azamattardyń qol kóterý jáıtteri kóbeıip bara jatqanyn jasyrmaıdy. Bazbiri úıindegi qyzdaryna osy ádisterdi úıretkisi keletinin aıtady. Qalaı bolǵanda da bapkerler úırenemin deýshilerge esikteri aıqara ashyp otyr. Aldaǵy kezde mundaı jattyǵýlar oblystyń qala-aýdandarynda uıymdastyrylatyn bolady.
