Shymkenttik qutqarýshylar soltústik aımaqtarǵa kómekke attandy

ShYMKENT. QazAqparat - Shymkenttik qutqarýshylar soltústik aımaqtarǵa kómekke ketti. Tótenshe jaǵdaılar qyzmetiniń 21 adamy joǵary ótimdi 5 avtokólik pen 5 motorly qaıyqtaryn alyp, Nur-Sultan qalasyna jol tartty, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, qutqarýshylar jańbyr kóp jaýǵan soltústik aımaqtarda kómek qolyn sozady.

«Máselen, Qaraǵandy oblysynda qarqyndy qar erýi saldarynan birneshe eldi mekende jáne avtokólik joldarynda sý jaıyldy. Kez kelgen sátte sý basýy múmkin aýdandarǵa kómekke jetý úshin barlyq aımaqtarda kúsh-quraldardyń toptamalary daıyndyqqa keltirilgen. Bul jaǵdaıdan shymkenttik jedel-qutqarý jasaǵynyń qutqarýshylary da shet qalǵan joq. TJD bastyǵy, azamattyq qorǵaý polkovnıgi Nurbolat Derbisovtiń jáne onyń orynbasary polkovnık Erǵalı Bahaevtyń basshylyǵymen qutqarýshylar 1 sáýirde jolǵa attanyp ketti» delingen habarlamada.

Atalǵan jasaq sondaı-aq, avtotehnıka sııaqty barlyq qajetti súńgýir qural-saımandarmen jáne qosalqy múliktermen jabdyqtalǵan. Toptyń avtonomdy túrde jumys júrgizý úshin azyq-túlik jáne janar-jaǵarmaı qory da bar. Búginde qalalyq TJD basshylyǵy sý tasqyny qaýpi bar aımaqtardaǵy áriptesterimen únemi baılanysta otyr. Olardyń málimdemesi boıynsha, jergilikti atqarýshy organdar men múddeli memlekettik organdar sý tasqynyn boldyrmaýǵa jáne halyqqa kómek kórsetýge baǵyttalǵan is-sharalar kesheni júrgizilip jatyr.