Shymkenttik kelinshek paıdaqorlyq maqsatta Túrkııa azamatyna qatysty tonaý uıymdastyrǵan
ASTANA. 23 qarasha. QazAqparat /Jasulan Amanbaıuly/ - Shymkenttik kelinshek paıdaqorlyq maqsatta Túrkııa azamatyna qatysty tonaý uıymdastyrdy.
Ol sybaılastarynyń kómegimen 30 jastaǵy shetel azamatynan 5 myń AQSh dollary men 5,5 mln. teńge bolatyn altyn buıymdaryn typ-tıpyl etken.
Bul týraly búgin baspasóz máslıhatynda QR Іshki ister mınıstrliginiń resmı ókili Nurdildá Oraz málim etti.
Resmı ókildiń aıtýynsha, 34 jastaǵy kúdikti áıel tonalǵan jábirlenýshiniń tanysy bolyp shyqty. Ol paıdaqorlyq maqsatta óziniń 34 jáne 39 jastaǵy eki tanysyna Túrkııa azamatyn tonaý týraly usynys jasaǵan.
Aldyn ala málimetter boıynsha, kelinshek jábirlenýshini saýda jasamaqshy bolyp ortalyq bazarǵa alyp shyqqan. Sodan soń olardyń joldaryna joǵaryda atalǵan eki azamat qarsy shyǵyp, Túrkııa azamatyna kúsh kórsetemiz dep qorqytqan, jábirlenshiniń 5 myń AQSh dollar aqshasyn jáne jalpy quny 5,5 mln. teńgeden asatyn altyn buıymdary men jeke zattaryn tartyp alǵan.
«Qazirgi ýaqytta ustalǵan adamdar ýaqytsha ustaý ızolıatoryna qamaldy. Qylmysqa qatysy bar taǵy bir adam izdestirilýde. Tergeý amaldary júrgizilýde», - dedi N. Oraz.
