Shymkenttik kásipker men onyń balasynyń ólimine qatysty qylmystyń beti ashyldy
ASTANA. 3 sáýir. QazAqparat - ІІM Krımınaldyq polıtsııa komıtetiniń qyzmetkerleri shymkenttik kásipkerdiń otbasyna jasalǵan qaraqshylyq shabýyldyń betin ashty.
Bul týraly búgin brıfıngte QR Іshki ister mınıstrliginiń resmı ókili Nurdildá Oraz málimdedi.
Atap aıtqanda, naýryz aıynyń ortasynda túngi saǵat 4-terdiń shamasynda betperde kıgen tórt adam úıge basyp kirip, otaǵasyn jáne onyń otbasyn uryp-soǵyp, aqsha talap etken. Nátıjesinde, dene jaraqatynyń saldarynan úıdiń ıesi jáne onyń 17 jastaǵy uly kóz jumady. Ártúrli dene jaraqatyn alǵan jubaıy men qyzy aýrýhanaǵa jetkiziledi. Qaskúnemder 50 myń AQSh dollaryn, shamamen 4,5 myń eýro, 3 mıllıon teńge kóleminde aqsha jáne altyn buıymdardy urlap, oqıǵa ornynan boı tasalaıdy.
«Qanquıly qylmystyń betin ashý úshin ІІM jáne oblystyq ІІD-niń tájirıbeli qyzmetkerlerinen quralǵan tergeý-jedel izdestirý toby quryldy. Júrgizilgen is-sharalar nátıjesinde Almaty oblysy Qaskeleń qalasynda buryn sottalmaǵan 38 jastaǵy Atyraý oblysynyń turǵyny ustaldy. Onyń meken-jaıyn tintý kezinde urlanǵan jarty keli altyn buıymdar jáne 4,5 myń eýro tabyldy. Anyqtalǵandaı, ustalǵan kúdikti kásipkermen tanys bolǵan jáne onyń qarjylyq jaǵdaıynyń jaqsy ekendigin bilgen. Shabýyl josparyn aldyn ala jasap qoıǵan ol Shymkentke kelip, qylmystyq isti júzege asyrý maqsatynda óziniń tanystaryn uıymdastyrǵan», - dedi resmı ókil.
Odan ári izdestirý sharalary barysynda kúni keshe Astana qalalyq Krımınaldyq polıtsııa komıtetiniń qyzmetkerleri atalǵan qylmystyq iske qatysy bar 39 jastaǵy Qyzylorda oblysynyń turǵynyn qolǵa túsirdi. Sondaı-aq, osy kúni quryqtalǵan kúdiktilerdiń taǵy bir sybaılasy - 25 jastaǵy Almaty oblysynyń turǵyny «Shymkent-Atyraý» baǵytyndaǵy poıyzda, Túlkibas stansasynda ustaldy. Búgin túnde Qyzylordada atalǵan qylmysqa qatysy bar tórtinshi kúdikti - buryn urlyq úshin sotty bolǵan 26 jastaǵy qala turǵyny quryqtaldy.Qazirigi tańda olardyń ózge de qylmystarǵa qatystylyǵy tekserilý ústinde.
