Shymkenttik kardıologtar júrek talmasyna ushyraǵan eki myńnan asa naýqasqa ota jasaǵan
TÚRKІSTAN. QazAqparat - Shymkenttiń kardıologııalyq ortalyǵy elimizde júrekke operatsııa jasaýda kósh bastap tur. Emdeý mekemesinde jyl basynan beri 2500-den asa naýqasqa ota jasalǵan, dep habarlaıdy QazAqparat tilshisi.
Qalalyq densaýlyq saqtaý basqarmasynyń málimetinshe, operatsııanyń basym bóligi júrek talmasyna ushyraǵan naýqastarǵa jasalyp otyr. 500-den asa ota kúrdeli túrde júrgizilgen. Ortalyqta, sondaı-aq, júrekke stend qoıý, qaqpaqshasyn aýystyrý, aortakoronarly shýnttaý otasy jáne týa bitti aqaýlaryn bekitý sııaqty operatsııalar da jasalǵan.
«Osy ýaqytqa deıin júrek ótkizgishtiginiń kúrdeli buzylýy aıqyndalǵan 843 naýqasqa turaqty elektrokardıostımýlıator ornatyldy, júrek yrǵaǵynyń kúrdeli buzylýy anyqtalǵan 600 naýqasqa elektrofızıologııalyq zertteý men radıojıilikpen ablıatsııa otasy júrgizildi. Ómirge qaýipti júrek yrǵaǵynyń buzylýy men júrektiń toqtap qalý qaýpi joǵary 74 naýqasqa avtomatty kardıoverter/defıbrıllıator ornatyldy. Sonymen qatar 18 naýqasqa bıventrıkýlıarly kardıoverter/defıbrıllıatorlar ornatyldy», -deıdi qalalyq kardıologııalyq ortalyqtyń bas dárigeri Spandııar Bekjigitov.
Búginde kardıologııalyq ortalyq respýblıkada Astana men Almatydan keıin úshinshi orynda tur. Munda oblys turǵyndarynan bólek ózge de óńirlerdiń turǵyndary em izdep kelýde. Sebebi, Qazaqstan boıynsha osy ortalyqta ǵana júrek aqaýlaryn emdeıtin qondyrǵy ornatylǵan.
