Shymkenttik kardıologtar reseılik dárigerlermen tájirıbe almasty
Atalǵan ortalyqta Reseıdiń Samara qalasy memlekettik medıtsınalyq ýnıversıtetiniń sáýleli jáne ýltradybystyq dıagnostıka kafedrasynyń dotsenti, medıtsına ǵylymynyń kandıdaty Olga Tereshına «Fýnktsıonaldyq dıagnostıka máseleleri» atty halyqaralyq sheberlik sabaǵyn ótkizdi.
Semınarda jergilikti mamandar sheteldik mamanmen dıagnostıkalaýdyń zamanaýı ádisterin jasaýda tájirıbe almasty.
«Emdeýdiń nátıjeli bolýy - dıagnostıkany durys qoıýǵa baılanysty. Óıtkeni, aýrýdy erte anyqtaǵanda onymen kúresý áldeqaıda jeńil. Tehnıka kún saıyn damyp jatqandyqtan, mamandar jańa qurylǵylarmen jumys jasaýdy jyldam meńgerýi tıis. Shymkenttik dárigerlermen sheberlik sabaqta jańa tehnologııalarmen jumys isteýdiń tyń ádisterimen bólistik», - dedi Olga Tereshına.
Shymkenttik dárigerlerdiń aıtýynsha, qaladaǵy medıtsınalyq uıymdar sońǵy úlgidegi dıagnostıkalyq qurylǵylarmen jabdyqtalǵan. Ári bilikti mamandar da jeterlik.
«Qaladaǵy 5 emhanada, qalalyq dıagnostıkalyq ortalyqta jáne aýdandarda 26 statsıonarlarda júrekke dıagnostıka jasaıtyn ÝDZ qurylǵylar ornatylǵan. Júrekti dıagnostıkalaý jyldan jylǵa jańaryp otyrǵandyqtan, mamandardyń biliktiligin artyryp otyrý qajet. Mamandar buryn Nur-Sultan, Almaty qalalarynda ulttyq ortalyqtarda biliktilik arttyrsa, endi reseılik mamandardy ózimizge shaqyrtyp otyrmyz», - deıdi Kardıologııalyq ortalyqtyń bas dárigeriniń orynbasary G.Shekerbekova.
Jýyrda atalǵan ortalyqqa ekspert klasynyń ýltradybystyq dıagnostıkalyq qurylǵysy jetkizilmek. Mamandar bul qurylǵynyń 3D, 4D rejımde kórýge múmkinshilik beretinin aıtady.