Shymkenttik depýtattar kópqabatty 42 úıdi qaıta jóndeýdi sheshti
ShYMKENT. QazAqparat - Bıyl Shymkentte kópqabatty 42 úıde jóndeý jumystary júrgiziledi.
Shymkent qalalyq máslıhatynyń kezekti otyrysynda 19 máseleni qaraǵan depýtattar eski úılerdi jańartý sheshimin qabyldady, dep habarlaıdy QazAqparat HAA tilshisi.
Sessııa barysynda qala ákiminiń orynbasary Beısenbek Janbosynov «Óńirlerdi damytý-2020» baǵdarlamasynyń oryndalý barysyn sóz etip, turǵyn úı ınspektsııasy bóliminiń esebine toqtaldy. Ol tozyǵy jetken kópqabatty úılerge kóńil bólip, jóndeý jumystaryna qarajat bólinetinin atap ótti.
«Óńirlerdi damytý-2020» baǵdarlamasy sheńberinde 2011-2016 jyldar aralyǵynda 110 úıde kúrdeli jóndeý jumystary júrgizildi, oǵan 1 mlrd. teńgeden astam qarjy jumsaldy. Bıyl taǵy 42 úıde jóndeý jumystary jasalady, - dedi B. Janbosynov.
Depýtattar bas qosqan jıynda sondaı-aq qaladaǵy qoǵamdyq kólik salasynyń ózekti máseleleri qozǵaldy. Qala ákiminiń orynbasary Qaırat Nurtaıdyń aıtýynsha, Yntymaq, Qazyǵurt, Mıras, Tekesý, Badam-2, Aınatas, Jańatalap, Aqjar, Aqtas, Ótemis, Abdýlabad, Dostyq-2, Asar-2 shaǵynaýdandarynda qoǵamdyq kólik baǵyttarynyń jumysyn uıymdastyrýda qıyndyqtar týyndaǵan.
«Sol sebepti, atalǵan shaǵynaýdandarǵa baratyn áleýmettik mańyzy bar avtobýs baǵyttarynyń jumysyn uıymdastyrý maqsatynda «Shymkent bus» JShS-men birlesip, áleýmettik mańyzy bar 10 baǵyttyń qozǵalys syzbalary daıyndalyp, bekitildi. Áleýmettik mańyzy bar baǵyttardy aıqyndaý jumystary aıaqtalǵan soń «Shymkent bus» JShS-ge jańa avtobýstar alyp berý josparlanýda»,-dedi Q.Nurtaı.
Sessııanyń kún tártibinde qaralǵan máselelerge máslıhat depýtattary biraýyzdan qoldaý tanytty.
