Shymkenttik dárigerler júregi toqtap qalǵan adamdy tiriltip aldy

ShYMKENT. QazAqparat – Shymkenttik dárigerler klınıkalyq ólim kúıine túsken adamdy tiriltip aldy, dep habarlaıdy QazAqparat tilshisi.

Shymkent qalalyq №2 aýrýhanasyna jedel járdemmen 52 jastaǵy qala turǵyny asa aýyr halde jetkizildi. Naýqas jolda klınıkalyq ólimdi bastap keshken. Qıyndyqtarǵa qaramastan, dárigerler oǵan der kezinde alǵashqy kómek kórsetti. Nátıjesinde júregi toqtap qalǵan turǵynnyń kúretamyry qaıta soqqan.

«Turǵyn aýrýhanaǵa jetkizilgen sátte jaǵdaıy óte aýyr boldy. Klınıkalyq ólimmen jetkizildi. IVL apparatyn qostyq. Qazirgi jaǵdaıy turaqty, naýqas ózdiginen demalyp jatyr. Patsıent úshinshi kúni jansaqtaý bóliminen kardıologııa bólimshesine aýystyryldy», - deıdi reanımatsııa bóliminiń meńgerýshisi Erjan Sheraliuly.