Shymkenttik dárigerler júkti áıeldiń júregine alǵash ret ashyq ota jasady
Ota jasalǵan júkti kelinshekke «1 tıpti qolqanyń jedel jyrtylýy» dıagnozy qoıylǵan. Mundaı aýrý kardıologııa men kardıohırýrgııada sırek kezdesedi. Statıstıka málimetterine súıenetin bolsaq, mundaı dıagnoz qoıylǵan patsıentterdiń 50% jedel járdem kelgenge deıin, qalǵany otaǵa deıin ólip ketedi. Operatsııa kezinde Kardıoortalyqtyń kardıohırýrgtar komandasy jasandy qan aınalym júıesiniń kómegimen júrekti toqtatyp qoıyp, qolqa tamyrynyń doǵasy men sýprakoronarlyq aımaǵyna protez ornatty. Bir mezette jasalǵan eki kúrdeli otanyń nátıjesinde salmaǵy 3 keliden asatyn ul bala dúnıege keldi. Dárigerler ana men sábıdiń búgingi jaǵdaıyn jaqsy dep baǵalaýda. Kardıohırýrgtar operatsııa kezinde ana men shaqalaqtyń ómirine qaýip tóngenin jasyrmaıdy. Táýekelge barǵan medıtsına mamandary otany sátti jasap shyǵyp, eki adamnyń ómirin aman alyp qaldy. Aıta keteıik, osy ýaqytqa deıin qalalyq Kardıologııa ortalyǵynda qosarlanǵan mundaı patologııamen júkti áıelge ota jasalmaǵan.
«Elimizdegi Respýblıkalyq ortalyqtarda birli-jarym mundaı jaǵdaılar bolǵan. Kóptegen jaǵdaılarda sanıtarlyq avıatsııa jelisi boıynsha Nur-Sultan qalasyndaǵy UǴKO respýblıkalyq ortalyqtarǵa tasymaldaýǵa májbúr bolatyn edik. Patsıentterdi sanıtarlyq avıatsııa jelisi boıynsha tasymaldaý memleket úshin shyǵyndy, sonymen qatar qolqanyń jyrtylýynyń asqynýy men ólim qaýpi óte joǵary. Bizdiń jaǵdaıda patsıenttiń hali tasymaldaýǵa jaramaıdy dep baǵalanǵan. Jedel túrde konsılıým uıymdastyrylyp, Shymkent qalasynyń Kardıologııalyq ortalyǵynda jedel túrde ota jasaý qajet degen sheshim qabyldandy»,- deıdi ortalyqtyń mamandary.
Eske salaıyq, Shymkent qalalyq Kardıologııa ortalyǵynda aǵymdaǵy jyly qolqa tamyry jyrtylǵan 7 naýqasqa ota jasalǵan. Nátıjeleri qanaǵattanarlyq dep baǵalanǵan.