Shymkenttik dárigerler ókpesiniń 90 paıyzy zaqymdanǵan adamdy aman alyp qaldy

ShYMKENT. QazAqparat – Shymkenttik dárigerler ókpesiniń 90 paıyzy zaqymdanǵan adamdy aman alyp qaldy. Elordadan kelgen 70 jastaǵy ájeı aýyr halde qalalyq juqpaly aýrýlar aýrýhanasyna túsken, dep habarlaıdy QazAqparat tilshisi.

Qalalyq densaýlyq saqtaý basqarmasynyń málimetinshe, ókpesi qabynǵan naýqas birden jansaqtaý bólimine jatqyzylǵan. Jasandy tynys alý apparatyna qosylǵan. Kompıýterlik tomografııa nátıjesinde keıýananyń ókpesiniń 90 paıyzy qabynǵany anyqtalǵan. Buǵan qosa naýqastyń dene qyzýy kóterilip ketken. Bilikti mamandar júrgizgen emniń nátıjesinde egde jastaǵy astanalyq turǵynnyń densaýlyǵy jaqsaryp, aýrýhanadan shyqty.

«Kórsetilgen emdik sharalardan keıin naýqastyń dene qyzýy tústi. Densaýlyq jaǵdaıynyń dınamıkasy túzelip, analızderi bir qalypqa keldi. Tynys alýy da jaqsardy», – deıdi Shymkent qalalyq juqpaly aýrýlar ortalyǵynyń dáriger-reanımatology Erkinbek Nurtaev.