Shymkenttik dárigerler ınsýlt alǵan áıeldi ajaldan alyp qaldy

ShYMKENT. QazAqparat - Shymkenttik dárigerler aıaǵy aýyr áıeldi ajaldan aman alyp qaldy. Qalalyq perınataldy ortalyqta bosanǵan 40 jastaǵy kelinshektiń jaǵdaıy birden nasharlap, esin joǵaltqan, dep habarlaıdy QazAqparat tilshisi.

Ortalyqtyń dárigerleri naýqasty shuǵyl túrde tekserip, mıyna qan quıylǵanyn anyqtady. Sońynan tez arada bas súıegine shuǵyl ota jasaý qajet dep sheshken. Kúrdeli otany qalalyq Densaýlyq saqtaý basqarmasynyń shtattan tys bas neırohırýrgi Sársen Pernebekov jasady. Hırýrgter ota kezinde bosanǵan áıeldiń bas súıegin ashyp, ınsýltten paıda bolǵan mıda uıyǵan qandy alyp tastaǵanyn aıtady.

«Komaǵa túsken áıelge birden ota jasaýǵa sheshim qabyldadyq. Otany eki saǵatqa jýyq jasadyq. Bas súıeginiń ota jasalǵan bóligi alynǵan kezde mıda eshqandaı tamyr soǵysy bolǵan joq. Mıdyń túsi qoıý, qyzyl tústi boldy. Navıgatsııalyq júıeniń kómegimen mıdyń ishindegi qan uıýdyń ornyn anyqtap, mıdyń ishki bóliginiń gematomasy ıaǵnı, qan uıýyn alyp tastadyq. Mı ishiniń qan aǵýyn toqtattyq», - deıdi ota jasaǵan neırohırýrg Sársen Pernebekov.

Mamandar qazir naýqastyń jaǵdaıy jaqsy dep otyr. 40 jasynda bala tapqan áıel sábıimen osylaısha aman esen qaýyshty.