Shymkenttik dárigerler analyq bezinde isigi bar 2 jasar qyzdy aman alyp qaldy
Búldirshindi jedel járdem qyzmeti Shymkent qalasyndaǵy №1 klınıkalyq balalar aýrýhanasyna jetkizgen. Kishkentaı naýqasty tekserip shyqqan dárigerler shuǵyl ota jasaý qajet dep tapqan. Onyń analyq bezinde paıda bolǵan isikti alyp tastaý úshin laparoskopııalyq joldy qoldanǵan. Kúrdeli operatsııa kezinde tájirıbeli hırýrgtar oń jaq analyq jumyrtqasynyń qatersiz isigin alyp tastap, qaýiptiń aldyn alǵan. Mamandardyń sózinshe, qyz balalarda mundaı jaǵdaılar sırek kezdesedi. Shymkenttik dárigerler 20 jyldyq tájirıbemizde bul ekinshi jaǵdaı deıdi.
«Kishkentaı qyz balalardyń jynys múshesi názik keledi. Іsikti der kezinde almaǵan jaǵdaıda jatyryna qaýip tónýi múmkin edi. Sátti jasalǵan otanyń arqasynda balaqaıdyń jaǵdaıy jaqsy. Operatsııadan keıin aýrýhanada bes-alty kún em alyp, anasymen birge úıine shyǵaryldy»,- deıdi operatsııa jasaǵan bilikti hırýrg Qaldybaı Tájibaev.
Aıta keteıik, hırýrýg Qaldybaı Tájibaev 19 jyldan beri medıtsına salasynda jumys istep keledi. Búgingi kúnge deıin altyn qoldy dáriger densaýlyǵynda aqaýy bar 10 myńǵa jýyq balaǵa ota jasaǵan. Ol 2000 jyldan bastap 2013 jylǵa deıin oblystyq balalar aýrýhanasynda balalar hırýrgy bolyp jumys istegen. Keıin 2013 jyldan bastap Shymkent qalalyq balalar klınıkalyq aýrýhanasyna aýysyp, balalardy emdeýde.
