Shymkenttik dámhanadan shyqqan órtten 2 úı men bir nysannyń shatyry janyp ketti
ShYMKENT. QazAqparat - Shymkentte keshe keshkisin dámhanadan shyqqan órtke qatysty mán-jaılar belgili boldy. Oblystyq tótenshe jaǵdaılar departamentiniń málimetinshe, tamaqtaný ornynan tutanǵan órt sol mańdaǵy eki úı men bir nysannyń shatyryna jaıylǵan, dep habarlaıdy QazAqparat HAA tilshisi.
Órttiń saldarynan «Marmelad» kafesiniń aýlasynda kólemi 81 sharshy metr tapshany men 12 sharshy metr jazǵy ashanasynyń shatyry janyp ketken. Tilsiz jaýdan kórshi turǵan Baıtursynov kóshesi № 24 «A» úıdiń 28 sharshy metr, № 24 úıdiń 48 sharshy metr jáne JK «Egizbaı» qarasty qaraýylhananyń 6 sharshy metr shatyryna ótken. Órttiń jalpy kólemi 175 sharshy metrdi quraǵan. Jalyndy sóndirýge 27 qyzmetker men 5 tehnıka jumyldyryldy. Tilsiz jaý saǵat 19:35-te tolyq sóndirildi. Zardap shekkender joq.
Eske salaıyq, keshe keshki saǵat altylar shamasynda qalanyń ortalyǵyndaǵy «Marmelad» dámhanasynan ot shyǵyp, jalyn kórshi turǵan úılerge tarap ketken bolatyn . Kýágerler órtengen dámhananyń syrtqy aýlasyn beıntaspaǵa túsirip, áleýmettik jelige salǵan edi. Ázirge TJD órttiń shyǵý sebepteri men keltirilgen shyǵyn kólemin anyqtap jatyr.
